ადიგენში მერობისთვის გამგებლის ყოფილი მოადგილე იბრძოლებს

საარჩევნო კანონმდებლობით, გათვალისწინებულ ვადებში, ადიგენის საარჩევნო ოლქში საინიციატივო ჯგუფებმა უკვე დაარეგისტრირეს განცხადებები, დამოუკიდებელი მერობის ან მაჟორიტარობის კანდიდატების შესახებ. საოლქო კომისიაში ასეთი სულ 7 განცახდება შევიდა, აქედან ერთი ადიგენის მერობის, ხოლო ექვსი სხვადასხვა თემებში მაჟორიტარობის კანდიდატებისაა.

ადიგენის მერობის დამოუკიდებელი კანდიდატობის მსურველი, გამგებლის ყოფილი მოადგილე მინდია ჯელიაა, რომელიც ადიგენის გამგებელმა ზაქარია ენდელაძემ თანამდებობიდან, მიმდინარე წლის 20 თებერვალს გაათავისუფლა.

მინდია ჯელია ადიგენის მერობის კანდიდატად ორ დღეში დარეგისტრირდება. მისივე თქმით, საინიციატივო ჯგუფის წევრებს, უკვე შეგროვებული აქვთ 200–მდე მხარდამჭერის ხელმოწერა, რაც ადიგენის მოსახლეობის ერთი პროცენტია და სავსებით საკმარისია.

ჯელია ფიქრობს, რომ ადიგენში ბევრი პრობლემაა, მათ შორის ყველაზე მწვავედ სოციალური პრობლემები დგას და მერად არჩევის შემთხვევაში, ამ კუთხით იმუშავებს.

„არავითარი ზედმეტი დაპირებები, ყველაფერი იქნება რეალური, პრობლემები ბევრი აქვს ადიგენის მოსახლეობას და ეს არის მთავარი მიზეზი, რატომაც გადავწყვიტე არჩევნებში დამოუკიდებელ კანდიდატად მონაწილეობა. ადიგენის მოსახლეობას უნდა ჰქონდეს კარგი ცხოვრება და კარგი მომავალი–ეს იქნება ჩემი მთავარი დევიზი“, – აცხადებს მინდია ჯელია.

იგი დარწმუნებულია, რომ სხვა კანდიდატების ძლიერი კონკურენტი იქნება და ხმათა უმრავლესობასაც მოიპოვებს: „ვფიქრობ, რომ ხმათა უმრავლესობას მოვიპოვებ“.

შეგახსენებთ, რომ 2017 წლის თვითმმართველობის არჩევნები 21 ოქტომბერს გაიმართება. ადიგენში მერობის სხვა დამოუკიდებელი კანდიდატი რომელიმე საინიციატივო ჯგუფს არ წარუდგენია, ანუ, ამ არჩევნებზე, ადიგენში, მინდია ჯელია ერთადერთი დამოუკიდებელი კანდიდატი იქნება.

[ლუბა გიორგაძე, ადიგენი]