ადიგენის გამგებლის პირველი მოადგილე მინდია ჯელია მოხსნეს

ადიგენის მუნიციპალიტეტის გამგებლის უკვე ყოფილი მოადგილის მინდია ჯელიას განცხადებით, მისი გათავისუფლების შესახებ ბრძანებას ხელი გუშინ, 20 თებერვალს მოეწერა.

„ჯერ არ არაფერი ჩამბარებია, მაგრამ ვიცი რომ გუშინ თანამდებობიდან გამათავისუფლეს“, – აცხადება ჯელია.

მას ჯერ ადიგენის მუნიციპალიტეტის გამგებელთან ზაქარია ენდელაძესთან ამის შესახებ არ უსაუბრია: „თბილისში ვიყავი, საავადმყოფოში, ოჯახური პრობლემების გამო. გუშინ დავბრუნდი, გამგებელს ჯერ არ შევხვდრივარ“.

ჯელია აცხადებს, რომ გათავისუფლების მიზეზი მისთვის უცნობია: „ეს თავად გამგებელს ჰკითხეთ, საკმაო ლოგიკა აქვს და აგიხსნით“.

გამგებელთან კითხვა ვცადეთ, თუმცა ზაქარია ენდელაძემ „სამხრეთის კარიბჭეს“ სატელეფონო ზარებს არ უპასიხა. ადიგენის მუნიციპალიტეტის გამგეობის საზოგადოებასთან ურთიერთობის სამსახურის წარმომადგენელმა მამუკა კალანდაძემ კი შეკითხვაზე, თუ რა გახდა ჯელიას გადაყენების მიზეზი, გვიპასუხა: „ამაზე კომენტარს ვერ გავაკეთებთ“.

ჯელიას გათავისუფლების შესახებ, არც გამგებლის მეორე მოადგილე არსენ ბალახაშვილი საუბრობს. მას არც უკვე ყოფილი კოლეგის მუშაობის შეფასება სურს: „მისი გადაყენების შესახებ ახლა თქვენგან გავიგე. ვერაფერს გეტყვით“.

გამგებლისა და მისი დარჩენილი მოადგილისგან განსხვავებით ჯელიას გადაყენების მიზეზებზე ადიგენის თვითმმართველობის სხვა თანამშრომლები ალაპარაკდნენ, თუმცა მათ ვინაობის გამჟღავნება არ ისურვეს. როგორც ისინი „სამხრეთის კარიბჭესთან“ აცხადებენ, ჯელია ადიგენის მუნიციპალიტეტის საკრებულოს თავმჯდომარის ლევან ლობჯანიძის საქმეს შეეწირა. მათი განმარტებით, ლობჯანიძის ხელახალი იმპიჩმენტი ორი ბათილი ბიულეტენის გამო ვერ შედგა: „ამ ორ ადამიანზე გავლენა ჯელიას უნდა მოეხდინა და მან ეს საკითხი ლობჯანიძის სასარგებლოდ გადაწყვიტა. ანუ მას ლობჯანიძის დაბრუნება სურდა, ენდელაძეს კი მისი იმპიჩმენტი“.

თავად ჯელია შეკითხვაზე, არის თუ არა მისი გათავისუფლების მიზეზი ლობჯანიძის საქმე, გვპასუხობს: „ამას არც უარვყოფ და არც ვადასტურებ. მე ამ საკითხთან დაკავშირებით ნეიტრალური პოზიცია მეკავა. იმ დღეს როცა ლობჯანიძის იმპიჩმენტის საკითხი წყდებოდა ჩემს კაბიენტში ვიყავი და გარეთ არ გავსულვარ“.

თუნდაც მის ნეიტრალურ დამოკიდებულებას რამდენად შეიძლებოდა, რომ გაეღიზიანებინა გამგებელი, რომელსაც ლობჯანიძის იმპიჩმენტი სურდა, ამაზე საუბრისგან უკვე ყოფილი მოადგილე თავს იკავებს.

მინდია ჯელიან გამგებლის პირველი მოადგილე 2014 წლის 15 ივნისიდანაა. მანამდე იგი „ქართული ოცნების“ ადიგენის შტაბს ხელმძღვანელობდა და როგორც თავად აცხადებს, პარტიული სიით საკრებულოშიც შევიდა.

[თამუნა უჩიძე, ადიგენი]