ადიგენის გამგებლის პირველ მოადგილედ, შესაძლოა, იმედა მღებრიშვილი დაინიშნოს

ამის შესახებ „სამხრეთის კარიბჭესთან“ ადიგენის ადგილობრივი თვითმმართველობის წარმომადგენლები აცხადებენ.

„ვეჭვობ, გამგებლის მოადგილედ მღებრიშვილს დანიშნავენ. ზაქარიასნაირი [ადიგენის გამგებელი] კაცისგან ყველაფერი მოსალოდნელია. ალბათ „ნაციონალების“ კიდევ ბევრი აქტივსიტი ეყოლება მას დასასაქმებელი და დაასაქმოს. ის ვიღაცის სურვილებს ასრულებს“, – აცხადებს გამგებლის უკვე ყოფილი მოადგილე მინდია ჯელია, რომელიც გამგებელმა ორი დღის წინ, 20 თებერვალს მოხსნა.

ვისი სურვილების შესრულება უხდება ადიგენის მუნიციპალიტეტის გამგებელს ამაზე ჯელია არ საუბრობს: „ამ ყველაფერს დრო გამოაჩენს“.
ადიგენის მუნიციპალიტეტის საკრებულოს ყოფილი თავმჯდომარე, ამჟამად კი დეპუტატი იმედა მღებრიშვილი გამგებლის მოადგილედ მისი დანიშვნის შესახებ გავრცელებულ ინფორმაციას კატეგორიულად უარყოფს: „აბსურდია, საკრებულოს დეპუტატად ვრჩები და აქ ვიმუშავებ ბოლომდე“.

ადიგენის მუნიციპალიტეტის გამგეობაში კომენტარის გაკეთებისგან თავს იკავებენ.

„ვერაფერს გეტყვით“, – ამბობს ადიგენის მუნიციპალიტეტის გამგეობის საზოგადოებასთან ურთიერთობის სამსახურის წარმომადგენელი მამუკა კალანდაძე.

შეგახსენებთ, რომ გამგებელმა ზაქარია ენდელაძემ მისი პირველი მოადგილის მინდია ჯელიას თანამდებობიდან გადაყენების შესახებ ბრძანებას ხელი 20 თებერვალს მოაწერა. გამგეობაში ჯელიას გადაყენების მიზეზს არ განმრატავენ. თვითმმართველობის წევრბი კი მის მოხსნას ლევან ლობჯანიძის საქმეს უკავშირებენ. მათი თქმით ჯელიას ლობჯანიძის ხელახალი იმპიჩმენტი არ სურდა და გამგებელი ამან გააღიზიანა. თავად ჯელია ამას არც უარყოფს და არც ადასტურებს.

დღეს დილიდან, ადიგენში, მინდია ჯელიას მომხრეები შეიკრიბნენ და საპროტესტო აქციას მართავენ. ადიგენის ცენტრში, გამგეობის შენობასთან, ამ დროისათვის 100–მდე ადამიანია შეკრებილი. „ქართული ოცნების“ აქტივისტები დაბაში ადიგენის სოფლებიდან ჩამოვიდნენ. ისინი ადიგენის გამგებლის მოადგილის, მინდია ჯელიას თანამდებობიდან გათავისუფლბას აპროტსტებენ და რამდენიმე მოთხოვნა აქვთ.

[თამუნა უჩიძე, ადიგენი]