ადიგენის გამგებელი: მოადგილის მოხსნაზე ახსნა–განმარტებებს არ ვაპირებ

ადიგენის გამგებელი ზაქარია ენდელაძე ამბობს, რომ პირველი მოადგილის, მინდია ჯელიას მოხსნა, მისი პირადი გადაწყვეტილება იყო, საკრებულოს თავმჯდომარის არშემდგარ იმპიჩმენტთან ამ ამბავს არანაირი კავშირი არ აქვს და ამ თემაზე, ახსნა–განმარტებების გაკეთებას არ აპირებს: "მინდა ჯელია არ იყო არც რაიმე პროექტი და არც ადიგენის მომავალი".

დღეს დილიდან გამგეობასთან შეკრებილ აქციის მონაწილეების მოთხოვნაზე, დაინიშნოს პარტიის რიგგარეშე ყრილობა ადიგენში, ადიგენის გამგებელი და პარტია "ქართული ოცნების" ადიგენის ორგანიზაციის თავმჯდომარე პასუხობს, რომ ამ ეტაპზე ვერც რიგგარეშე ყრილობის მოწვევის საჭიროებას ხედავს.

რაც შეეხება გავრცელებულ ინფორმაციას, მოადგილედ იმედა მღებრიშვილის დანიშვნის თაობაზე, ზაქარია ენდელაძე ამბობს, რომ ეს საკითხი არ განიხილება და ამ ეტაპზე ვერც ამ თემაზე ისაუბრებს.

შეგახსენებთ, 20 თებერვალს, ზაქარია ენდელაძემ პირველი მოადგილე, მინდია ჯელია, თანამდებობიდან მოხსნა. ამ ამბავს, დღეს, დილიდან, ადიგენში, მინდია ჯელიას მხარდამჭერების საპროტესტო აქცია მოჰყვა. აქციის მონაწილეები ზაქარია ენდელაძისგან, რომელიც ამავე დროს პარტიის თავმჯდომარეა ადიგენში, ითხოვენ პასუხს კითხვაზე, რატომ გაათავისუფლა პირველი მოადგილე; ასევე, აქტივისტები პარტიის რიგგარეშე ყრილობის მოწვევასა და ახალი ხელმძღვანელების არჩევას მოითხოვენ.

[ლუბა გიორგაძე, ნინო ნარიმანიშვილი, ადიგენი]