ადიგენის გამგეობამ კიდევ ერთი საქმე წააგო – გაასაჩივრებენ თუ არა სასამართლოს გადაწყვეტილებას, უცნობია

ახალციხის რაიონული სასამართლოს გადაწყვეტილების მიხედვით, ადიგენის მუნიციპალიტეტის გამგებლის ყოფილი მოადგილე მინდია ჯელია სამსახურში უნდა აღადგინონ და იძულებით განაცდური აუნაზღაურონ.

ჯელიას ყოველთვიური სახელფასო ანაზღაურება, ხელზე ასაღები, 1 340 ლარი იყო. ამიტომ თუ ახალციხის რაიონული სასამართლოს გადაწყვეტილება ძალაში შევა და ჯელიას სამსახურში აღადგენენ, ბიუჯეტიდან მას სამი თვის ხელფასს 4020 ლარს აუნაზღაურებენ.

მაგრამ თუ ადიგენის მუნიციპალიტეტის გამგეობა პირველი ინსტანციის სასამართლოს გადაწყვეტილებას გაასაჩივრებს და პროცესს ვერ მოიგებს, რაც დროში გაიწელება, ადგილობრივი ბიუჯეტი კიდევ ათასობით ლარს იზარალებს.

აპირებს თუ არა გამგეობა ჯელიას საქმის გასაჩივრებას, უცნობია. ადიგენის მუნიციპალიტეტის გამგეობის საზოგადოებასთან ურთიერთობის სამსახურის წარმომადგენელი ეთერ ლობჯანიძე, მესამე დღეა „სამხრეთის კარიბჭეს“ სატელეფონო ზარებს არ პასუხობს.

„გამგებელთან შევათანხმებ და პასუხს გაგაგებინებთ“, – გვითხრა მან სამი დღის წინ.

სატელეფონო ზარებს არც გამგებელი ზაქარია ენდელაძე და არც ადიგენის მუნიციპალიტეტის იურისტი მადონა გულიაშვილი პასუხობენ.
„მგონია რომ გაასაჩივრებენ. უფრო სწორედ, ზაქარიას რასაც უკარნახებენ, იმას გააკეთებს. არამგონია ეგ ადიგენის ბიუჯეტზე ზრუნავდეს. ეგრე რომ ყოფილიყო, არც ადიგენის საკრებულოს თავმჯდომარის იმპიჩმენტის საქმეში ჩაერეოდა“, – აცხადებს ადიგენის მუნიციპალიტეტის გამგებლის ყოფილი მოადგილე მინდია ჯელია.

შეკითხვაზე, ვინ არის ის, ვის მითითებებსაც ზაქარია ენდელაძე ასე ემორჩილება, გვპასუხობს: „ამ ეტაპზე ამის გამჟღავნებისგან თავს შევიკავებ“.

შეგახსენებთ, რომ ადიგენის მუნიციპალიტეტის გამგებელმა მისი მოადგილე მინდია ჯელია სამსახურიდან მიმდინარე წლის 20 თებერვალს გაათავისუფლა. გამგებლის გადაწყვეტილება ჯელიამ სასამართლოში გაასაჩივრა, სადაც მისი გათავისუფლების შესახებ ბრძანების ბათილად ცნობა, სამსახურში დაბრუნება და იზულებით განაცდურის ანაზღაურება მოითხოვა. ახალციხის რაიონულმა სასამართლომ ჯელიას სარჩელი 11 მაისს სრულად დააკმაყოფილა.

[თამუნა უჩიძე, ადიგენი]