მოხის სადავო შენობაზე ერთობლივი კომისია იმუშავებს

ამის შესახებ „სამხრეთის კარიბჭესთან“ რელიგიის საკითხთა სახელმწიფო სააგენტოს თავმჯდომარემ ზაზა ვაშაყმაძემ განაცხადა. იგი ბოლო დროს მოხეში განვითარებული მოვლენების გასაცნობად ადიგენში გუშინ, 26 ოქტომბერს იმყოფებოდა. ვაშაყმაძე ადგილობრივი თვითმმართველობის წარმომადგენლებს, მუსლიმ და ქრისტიან მრევლს შეხვდა.

„ადიგენში გამგეობაში უნდა ჩამოსულიყო სამცხე-ჯავახეთის მუფთი მამუკა ვაშაყმაძეც, ჩვენ აქ უნდა შევხვედროდით ერთმანეთს, თუმცა მოგვიანებით მან მესიჯი მომწერა, რომ მრევლი არ უშვებდა. ბუნებრივია, მათთან შესახვედრად ჭელაში ავედით, ჩემთან ერთად წამოვიდა გამგებელიც და იქ გავმართეთ შეხვედრა“, - ამბობს ზაზა ვაშაყმაძე.

სამცხე-ჯავახეთის მუფთი მამუკა ვაშაყმაძე ზაზა ვაშაყმაძის განცხადებას ადასტურებს და ამბობს, რომ ადიგენის გამგეობაში შეხვედრაზე მხოლოდ იმ შემთხვევაში წავიდოდა, თუ ის სამუშაო საათებში, ჟურნალისტების თანდასწრებით, ოფიციალური ფორმატით გაიმართებოდა.

„ამ საქმის „ქურდული“ გარჩევა არ მინდა, - განაცხადა მამუკა ვაშაყმაძემ და დაამატა, რომ ამის თქმის საფუძველს გუბერნატორთან 20 ოქტომბრის საღამოს გამართული შეხვედრა აძლევს, - ამ გამოცდილების გამო, მრევლმა არ მომცა უფლება მარტო წავსულიყავი საღამოს რვა საათზე შეხვედრაზე. მე თუ წავიდოდი 300 კაციც გამომყვებოდა თან და ამის გამო შესაძლოა რაიმე ექსცესს ჰქონოდა ადგილი“.

ზაზა ვაშაყმაძის განცხადებით, ჭელაში ძალიან კარგი შეხვედრა შედგა: „მუსლიმი მრევლიც და ქრისტიანი მრევლიც თანახმაა რომ იქ სამუშაოდ სპეციალური კომისია შეიქმნას“.

კითხვაზე, სამუშაოების შეჩერაბასთან და სპეციალური კომისიის შექმნასთან დაკავიშრებით დაითანხმა თუ არა ადიგენის მუნიციპალიტეტის გამგებელი ზაქარია ენდელაძე, გვიპასუხა: „ეს მას ჰკითხეთ თავად“.

„თათბირზე ვარ და ვერაფერს გიპასუხებთ“, - გვითხრა სატელეფონო საუბარში ადიგენის გამგებელმა. თუმცა, „სამხრეთის კარიბჭეს“ ინფორმაცია იმის შესახებ, რომ სამუშაოები შეჩერდება და შენობის წარმომავლობის გასარკვევად კომისია შეიქმნება, სამცხე-ჯავახეთის გუბერნიაში დაგვიდასტურეს.


შეგახსენებთ, რომ შენობის გამო მოხეში დაძაბულობა 18 ოქტომბრიდან დაიწყო, მას შემდეგ, რაც ყოფილი მეჩეთის შენობაში ტენდერში გამარჯვებული ფირმის წარმომადგენლებმა მისი დემონტაჟი დაიწყეს. მუსლიმი მრევლი შენობის მათთვის გადაცემას, ახალციხისა და ტაო-კლარჯეთის მიტროპოლიტი მეუფე თეოდორე კი სადაო შენობის საპატრიარქოსთვის გადაცემას ითხოვს.

[თამუნა უჩიძე, ახალციხე]