მოხეს სადავო შენობას ‘სადავო საკულტო ნაგებობის’ სტატუსი მიენიჭება

ამის შესახებ გადაწყვეტილება ე.წ. მოხეს კომისიამ მიიღო, რომელიც დღეს 1 დეკემბერს სამცხე–ჯავახეთის სამხარეო ადმინისტრაციაში დაახლოებით ორი საათის განმავლობაში მსჯელობდა.

სხდომის დასრულების შემდეგ გადაწყვეტილება მედიის წარმომადგენლებს კომისიის თავმჯდომარემ ზაზა ვაშაყმაძემ გააცნო.

„კომიას იმსჯელა წინა სხდომაზე შემოთავაზებული შემოთავაზებების შესახებ და დაადგინა, რომ პირველი: მუსლიმი თემისთავის შეთავაზებული იქნება რამდენიმე ადგილი სოფელ მოხეს ცენტრში ახალი მეჩთის მშენებლობისათვის, რითაც მოიხსნება ლოცვის პრობლემა, ვინაიდან, მუსლიმმა თემმა უარი განაცხადა ძველი სალოცავი სახლის გამოსყიდვაზე, სახელმწიფოს მხრიდან და შემდგომ მუსლიმთა სამმართველოს გადაცემაზე.

მეორე: ახალი მეჩეთისათვის ადგილის შერჩევისა და მუსლიმთა სამმართველოსათვის ადგილის გადაცემის შემდეგ, ე.წ. მოხეს შენობას მიენიჭება კულტურული მემკვიდრეობის ძეგლის სტატუსი, სავარაუდო სახელწოდებით „სადავო საკულტო ნაგებობა“.
შესაბამისი პროცედურების დაცვით შენობა ამოირიცხება მუნიციპალიტეტის ბალანსიდან და გადავა კულტურული მემკვიდრეობისა და ძეგლთა დაცვის ეროვნული სააგნტოს ბალანსზე.

ძეგლთა დაცვის სააგენტო მოამზადებს და კომისიას წარუდგენს მერე უკვე ძეგლის სტატუსის მინიჭებული სადავო საკულტო ნაგებობის სამომავლო მოვლა–შენახვის პროექტს და შემდგომ კომისიას გააცნობს“, – განაცხადა ზაზა ვაშაყმაძემ

[თამუნა უჩიძე, ადიგენი]