„მოხეს კომისიის“ წევრების შეხვედრა ადგილობრივებთან გადაიდო

შეხვედრის ჯერ–ჯერობით გაუკრვეველი ვადით გადაწევის მიზეზი მუფთის ბეგლარ ქამაშიძის ჯანმრთელობის მდგომარეობა გახდა. როგორც ქამაშიძე „სამხრეთის კარიბჭესთან“ სატელეფონო საუბარში აცხადებს, ამჟამად იგი შეუძლოდაა.

„შეუძლოდ ვარ, ამიტომ ჯერ არ დაგვიგეგმავს შეხვედრა როდის შედგება“, – ამბობს ქამაშიძე.

მოხეს კომისიის წევრები, ადგილობრივ მუსლიმ და ქრისტიან მრევლთან დაანონსებული შეხვედრის ჩატარებას ქამაშიძის საზღვარგარეთიდან დაბრუნების შემდეგ გეგმავდნენ. სავარაუდო თარიღად მაისის ბოლოს უთითებდნენ.

სამცხე–ჯავახეთის მუფთი მამუკა ვაშაყმაძე ვარაუდობს, რომ დაგეგმილი შეხვედრა ივნისის დასაწყისში შედგება, თუმცა ამბობს, რომ ეს დამოკიდებული ქამაშიძის ჯანმრთელობის მდგომარეობაზეა.

შეგახსენებთ, რომ ე.წ. მოხეს კომისიამ მუშაობა 11 მაისს დაასრულა. აღნიშნული კომისიის გადაწყვეტილების მიხედვით, სადავო შენობა სადავო სტატუსით ძეგლთა დაცვის ეროვნულ სააგენტოს გადაეცემა. სოფელში კი ახალი მეჩეთი აშენდება.

მოხეს კომისიის გადაწყვეტილებას ადგილბორივი ქრისტიანი თემი ეთანხმება, მუსლიმების თითქმის სრული უმრავლესობა კი აპროტესტებს და ლოცვის გაგრძელებას კვლავ ღია ცის ქვეშ აპირებს.

[თამუნა უჩიძე, ადიგენი]