მოხეში სადავო შენობის წარმომავლობის დამდგენ კომისიას ორი პირი დაემატება

ამის შესახებ გადაწყვეტილება კომისიამ დღეს, 27 დეკემბერს მიიღო. სახალხო დამცველს აღნიშნული გადაწყვეტილების შესახებ წერილობით ეცნობება.

„სახალხო დამცველის ჩართვას კომისიაში დამკვირვებლის სტატუსით ითხოვდნენ, თუმცა, მივიღეთ გადაწყვეტილება, რომ უჩა ნანუაშვილი კომისიის წევრად ჩავრთოთ“,-ამბობს რელიგიის სახელმწიფო სააგენტოს თავმჯდომარე ზაზა ვაშაყმაძე.

კომისიის მეორე ახალი წევრი, სამუფთო სამმართველოს წარმომადგენელი, ოთარ ნადირაძე მუსლიმი თემის ნდობით აღჭურვილი პირია. მისი კომისიაში ჩართვის შესახებ ადიგენში მცხოვრებმა მუსლიმებმა, დაახლოებით ერთი კვირის წინ, სოფელ დერცელში, დასავლეთ საქართველოს მუფთის ბეგლარ ქამაშაძის სტუმრობისას ითათბირეს.

ნადირაძის დამატების შემდეგ კომისიაში ოთხი მუსლიმი და სამი ქრისტიანი რჩება. აპროტესტებენ თუ არა ქრისტიანები, იმას რომ კომისიაში მეტი მუსლიმი და ნაკლები ქრისტიანია, „სამხრეთის კარიბჭემ“ ამის გარკვევა ახალციხისა და ტაო – კლარჯეთის მიტროპოლიტთან, მეუფე თეოდორესთან ვერ შეძლო. მან სატელეფონო ზარებს არ უპასუხა. თუმცა, როგორც ზაზა ვაშაყმაძე აცხადებს, ქრისტიანები კომისიაში მუსლიმის დამატებას არ აპროტესტებენ.

ოთარ ნადირაძის კომისიაში შესვლის შემდეგ კი მუსლიმი თემი კომისიას, რომელსაც ამ დრომდე შემადგენლობის გამო უნდობლობას უცხადებდა, ენდობა.

„ნადირაძე მუსლიმ თემში დიდი პატივისცემით სარგებლობს. მისი დამატების შემდეგ ადგილობრივები კომისიას ენდობიან. ამაზე ჩვენ დერცელში მუფთის სტუმრობისას ვისაუბრეთ“, - ამბობს სამცხე-ჯავახეთის მუფთი მამუკა ვაშაყმაძე.

გარდა კომისიის წევრების დამატებისა, დღევანდელ სხდომაზე შეიმუშავეს დებულება იმის შესახებ, რა ფორმატში იმუშავებს კომისია.

„ასევე, ძეგლთა დაცვის წარმომადგენელმა წარმოადგინა ის საკითხები თუ რა არის გასაკეთებელი კვლევა-ძიების თვალსაზრისით. მომავალ სხდომაზე იგი ამ მიმართულებით უკვე პროექტს გაგვაცნობს“, - აცხადებს ზაზა ვაშაყმაძე.

მისი თქმით, არ არის გამორიცხეული მომავალი სხდომები სამცხე-ჯავახეთში გაიმართოს. კომისია ახალი შემადგენლობით 9 თებერვალს, 14:00 საათზე შეიკრიბება.

[თამუნა უჩიძე, ახალციხე]