პირველი სკოლის ‘რემონტი’ მეორე ვადაშიც ვერ დასრულდა

დღეს, 30 ნოემბერს, „ინტერ პლიუსს“ ახალციხის პირველ საჯარო სკოლაში ხელშეკრულებით გათვალისწინებული სარემონტო სამუშაოების ვადა ამოეწურა, თუმცა, სკოლაში მუშები ჯერ კიდევ რჩებიან.

„არ ვიცით ჯერ როდის დავასრულებთ, დღეს უნდა გაირკვეს, გადაგვიწევენ თუ არა მშენებლობის დასრულების ვადას“, – ამბობს „ინტერ პლიუსის“ ფინანსური დირექტორი ლექსო მათეშვილი.

როგორც მშენებელი კომპანიის გენერალური დირექტორი ოთარ ბიძინაშვილი განმარტავს, „ინტერ პლიუსს“ მშენებლობის ვადა პირველად 30 სექტემბრამდე გადაეწია, მეორედ კი 30 ნოემბრამდე. როგორც იგი „სამხრეთის კარიბჭესთან“ 26 ნოემბერს მიცემულ ინტერვიუში აცხადებს, თუ ამ ვადაში სკოლაში რემონტი ვერ დასრულდება კომპანია დაჯარიმდება.

შეკითხვაზე, დაიწყება თუ არა დღეიდან „ინტერ პლიუსზე“ ჯარიმის დარიცხვა, ლექსო მათეშვილი გვპასუხობს, რომ არ იცის: „ალბათ ამის შესახებ ორ დღეში მეცოდინება“.

ამ დროისთვის სკოლას გარედან ხარაჩოები მოხსნილი აქვს, თუმცა როგორც მუშები აცხადებენ, შიგნით გასაკეთებელი ჯერ კიდევ ბევრი რამ დარჩა.

„ინტერ პლიუსის“ დაჯარიმების, ან სამუშაო ვადის გადაწევასთან დაკავშირებით, დამკვეთის, „ათასწლეულის გამოწვევის ფონდის“ პოზიცია ჯერ უცნობია. უწყებიდან რედაქცია პასუხს ამ დრომდე ელოდება.

შეგახსენებთ, რომ ახალციხის პირველ საჯარო სკოლაში სარემონტო სამუშაოები აგვისტოში უნდა დასრულებულიყო, თუმცა ამ დრომდე მიმდინარეობს. ვადების დარღვევაში დამკვეთი „ათასწლეულის გამოწვევის ფონდი“ შემსრულებელს „ინტერ პლიუსს“ ადანაშაულებს. მშენებელი კი პირიქით, დამკვეთს არასრულყოფილი პროექტის შედგენაში სდებს ბრალს.

[თამუნა უჩიძე, ახალციხე]