დამკვეთი: ’პირველ სკოლაში რემონტი 30 სექტემბერს დასრულდება'

„ათასწლეულის გამოწვევის ფონდმა“ ახალციხის პირველ საჯარო სკოლაში სარემონტო სამუშაოების დასასრულებლად ახალი კომპანია „ჯეო ინჯენიერინგი“ შეარჩია. მუშაობას ახლადგამოვლენილი კომპანია მომავალი კვირიდან შეუდგება.

„ამ კომპანიამ სკოლაში სამუშაოები 30 სექტემბერს უნდა დაასრულოს, თუმცა ვეცდებით, რომ უფრო სწრაფად მორჩეს, მაგრამ არა ისე, რომ დროს ხარისხი შეეწიროს. ამ პროცესს ჩვენი თანამშრომლები ადგილზე დააკვირდებიან“, – აცხადებენ „ათასწლეულის გამოწვევის ფონდის“ საზოგადოებასთან ურთიერთობის სამსახურში.

მათი თქმით, სკოლაში დასასრულებელი მცირე სამუშაოებია: „რემონტის დიდი ნაწილი გაკეთებულია, დარჩენილია მაგალითად კიბეების უჯრები, ზოგგან კედელია ჩამოსაფხეკი და ა.შ.“

„ათასწლეულის გამოწვევის ფონდმა“ ხელშკერულება შპს „ინტერ პლიუსთან“, ანუ იმ კომპანიასთან რომელიც პირველ საჯარო სკოლაში სარემონტო სამუშაოებს ახორციელებდა 7 ივლისს შეწყვიტა.

შეგახსენებთ, რომ პირველი სკოლის რემონტი 2016 წლის დასაწყისში დაიწყო და აგვისტოში უნდა დასრულებულიყო, თუმცა დღემდე არ დასრულებულა.ვადების დარღვევაში დამკვეთი „ათასწლეულის გამოწვევის ფონდი“ შემსრულებელს „ინტერ პლიუსს“ ადანაშაულებს. მშენებელი კი პირიქით, დამკვეთს არასრულყოფილი პროექტის შედგენაში სდებს ბრალს.

[თამუნა უჩიძე, ახალციხე]