პირველი სკოლის მშენებელს ჯარიმები დაეკისრება

დღეს, 30 ნოემბერს „ინტერ პლიუსს“, რომელიც ახალციხის პირველ საჯარო სკოლას არემონტებს, ხელშეკრულებით გათვალისწინებული ვადა მეორედ ამოეწურა.

როგორც დამკვეთის, „ათასწლეულის გამოწვევის ფონდის – საქართველოს მთავრობასთან, ბიზნესთან და საზოგადოებასთან ურთიერთობის დირექტორი გიორგი კოპალეიშვილი ამბობს, კონტრაქტორს პირველი დეკემბრიდან ხელშეკრულების პირობებით გათვალისწინებული ჯარიმა დაეკისრება: „ხელშეკრულების ვადა გაუგრძელდებათ და პარალელურ რეჟიმში ამოქმედდება ჯარიმა, თუ აღარ გაუგრძელდებათ ხელშეკრულება და ჯარიმა ისე დაეკისრებათ, ეს არ ვიცი“.

მისი თქმით, როცა „ინტერ პლიუსი“ კონტრაქტზე ხელს აწერდა, მან ხელშეკრულებით გათვალისწინებული სანქციების შესახებ იცოდა: „თუ რაიმე ხელშეკრულებით გათვალისწინებულ პუნქტებს გაცდება, სანქციები რომ ამოქმედდება, ამის შესახებ, ბუნებრივია, ინფრომირებული არიან. ეს მათი ინფორმირებული არჩევანია. ამაში ჩაერთვებიან ჩვენი იურისტები, დონორი და ა.შ“.

შეგახსენებთ, რომ ახალციხის პირველ საჯარო სკოლაში სარემონტო სამუშაოები აგვისტოში უნდა დასრულებულიყო, თუმცა ამ დრომდე მიმდინარეობს. ვადების დარღვევაში დამკვეთი „ათასწლეულის გამოწვევის ფონდი“ შემსრულებელს „ინტერ პლიუსს“ ადანაშაულებს.

მშენებელი კი პირიქით, დამკვეთს არასრულყოფილი პროექტის შედგენაში სდებს ბრალს.

[თამუნა უჩიძე, ახალციხე]