პირველ სკოლაში რემონტი შეწყდა

ახალციხის პირველ საჯარო სკოლაში სარემონტო სამუშაოები შეწყდა. შენობა დაკეტილია. სავარაუდოდ აქ მშენებლობა აგვისტოს დასაწყისში განახლდება.

„ივლისის ბოლოს უკვე გვეყოლება გამარჯვებული კომპანია. ტენდერი დაჩქარებული წესით მიმდინარეობს მხოლოდ იმ კომპანიებისთვის, რომლებიც ჩვენთან სკოლების რემონტზე მუშაობენ“, – აცხადებს „ათასწლეულის გამოწვვევის ფონდის საზოგადოებასთან ურთიერთობის სამსახურის წარმომადგენელი გიორგი კოპალეიშვილი.

კომპანია „ინტერპლიუსს“ კონტრაქტი 7 ივლისს შეუწყდა. მას შენობის დატოვება ისე მოუხდა, რომ სარემონტო სამუშაოები ვერ დაასრულა.

შეგახსენებთ, რომ პირველი სკოლის რემონტი 2016 წლის დასაწყისში დაიწყო და აგვისტოში უნდა დასრულებულიყო, თუმცა დღემდე არ დასრულებულა.ვადების დარღვევაში დამკვეთი „ათასწლეულის გამოწვევის ფონდი“ შემსრულებელს „ინტერ პლიუსს“ ადანაშაულებს. მშენებელი კი პირიქით, დამკვეთს არასრულყოფილი პროექტის შედგენაში სდებს ბრალს.

[თამუნა უჩიძე, ახალციხე]