დამკვეთი ახალციხის პირველ სკოლაში არსებულ ვითარებას სწავლობს

ახალციხის პირველ საჯარო სკოლაში სარემონტო სამუშაობი ისევ არ დასრულებულა.

„ჩამორჩენა ისევ არის, ჩვენი წარმომადგენელია ახალციხეშია და ადგილზე ეცნობა დეტალებს. არსებული ვითარების შესახებ ზუსტი ინფრომაცია 9 იანვარს, ორშაბათს გვექნება“, – აცხადებს „ათასწლეულის გამოწვევის ფონდის“ მთავრობასთან, ბიზნესთან და საზოგადოებასთან ურთიერთობის დირექტორი გიორგი კოპალეიშვილი.

მისი თქმით, მშენებელ კომპანიას ჯარიმა ისევ ერიცხება. აღნიშნული თანხის ოდენობა კი დღეში 500 დოლარს შეადგენს. ჯარიმის დარიცხვა დამკვეთმა პირველი დეკემბრიდან დაიწყო.

შეგახსნებთ, მშენებელ კომპანიაში „ინტერ პლიუსში“ აცხადებდნენ, რომ შენობას წლის ბოლოს დატოვებდნენ და მომავალი წლიდან აქ სასწავლო პროცესის განახლება შესაძლებელი იქნებოდა, თუმცა სკოლაში მუშაობას მათი წარმომადგენლები ჯერ კიდევ აგრძელებენ.

პირველ სკოლაში რემონტი სახელშეკრულებო პირობების მიხედვით 2016 წლის აგვისტოში უნდა დასრულებულიყო. ვადების დარღვევაში დამკვეთი „ათასწლეულის გამოწვევის ფონდი“ შემსრულებელს „ინტერ პლიუსს“ ადანაშაულებს. მშენებელი კი პირიქით, დამკვეთს არასრულყოფილი პროექტის შედგენაში სდებს ბრალს.

[sknews.ge]