ახალციხის მუნიციპალიტეტში 10-ზე მეტი ობიექტი შენდება, თუმცა ”სამხრეთის კარიბჭეს” მშენებლები მხოლოდ სამ ობიექტზე დახვდნენ.
- ”მხოლოდ საახალწლოდ, 3 დღე შევისვენეთ, არ შევფერხებულვართ, ჩვეულებრივ გავაგრძელეთ მუშაობას”, - გვითხრა მუშამ აზაკ ტოროსიანმა, რომელიც ე.წ. საბარგო სადგურზე საკონსერვო ქარხნის მშენებლობაზე მუშაობს.
როგორც რკინიგზის სადგურთან მშენებარე სასტუმროს მუშებმა გვითხრეს, მუშაობა არც აქ შეჩერებულა. არ შეჩერებულა მუშაობა სასაკლაოს მშენებლობაზეც.
- ”სამუშაოების ძირითადი ნაწილი თითქმის დასრულებულია, არ ვიცი ფუნქციონირებას როდის დაიწყებს”, - ამბობს წამყვანი სპეციალისტი ნიკო ბერიძე.
ვერავინ ვნახეთ, 9 აპრილის ქუჩაზე მშენებარე კორპუსთან. თუმცა, როგორც აქ გასულ თვეებში დასაქმებულმა კახაბერ მოდებაძემ გვითხრა, მშენებლობა დროებითაა შეჩერებული ყინვების გამო და მუშაობა უახლოეს ერთ კვირაში განახლდება: ”იყვნენ უფროსები ჩამოსული, დაათვალიერეს ადგილი, ეზოში კომუნიკაციების დასაქსელად გეგმა შეადგინეს და წავდინენ”.
აქ მშენებარე კორპუსის ხუთი სართული უკვე აყვანილია, მას ოთხი სართული კიდევ უნდა დაადგან.
- ”სამი თვეა გაჩერებულები არიან, არ ვიცით მშენებლობას როდის გააგრძელებენ”, - გვითხრეს ვალეში, ე.წ მეორე შახტის ტერიტორიაზე მშენებარე ტერმინალზე სახელმწიფო დაცვის სამსახურის წარმომადგენლებმა.
ყოფილი პოლიკლინის ადგილზე მშენებარე სასტუმროს კარკასი შეკრულია, დასრულებულია სახურავის მშენებლობაც. სასტუმროს მშენებელი ფირმის შპს ”ფოცხოვის” ხელმძღვანელის თამაზ თედორაძის თქმით, ამჟამად სამუშაოები შეჩერებული მხოლოდ უამინდობის გამოა: ”როგორც კი დათბება, მშენებლობას განვაახლებთ”.
შეჩერებულია ხელოვნურ ტბასთან სასტუმროს მშენებლობა; სამუშაოები არ მიმდინარეობს რაბათის შესასვლელთან მშენებარე ობიექტზეც.
- ”აბსოლიტურად არაფერი შეგვიჩერებია, თუ ამ ეტაპზე სადმე მშენებლობა არ მიმდინარეობს, მიზეზი მხოლოდ ყინვა და ზამთარია. განაცხადი რომელიმე ორგანიზაციისგან იმის შესახებ, რომ რაიმე მიზეზის გამო მშენებლობას აღარ გააგრძელებენ, ამ დრომდე არ მიგვიღია”, - გვითხრა ახალციხის მუნიციპალიტეტის გამგეობის ეკონომიკისა და ინფრასტრუქტურის სამსახურის უფროსმა თენგიზ ზედგინიძემ.
ახალციხის მუნიციპალიტეტის გამგებლის მოვალეობის შემსრულებელი ბესიკ ხითარიშვილი კი აცხადებს, რომ მიმდინარე თვის დასრულებამდე ქალაქში მშენებარე ყველა ობიექტს სპეციალურად მოწვეული აუდიტი შეისწავლის: ”ტენდერი უკვე გამოვაცხადეთ”.
მისი თქმით, აუდიტის მოწვევის სურვილი იმიტომ გაჩნდა, რომ ხელისუფლების შეცვლის შემდეგ, ახალმა მთავრობამ უნდა იცოდეს თუ რას იბარებს: ”ბუნებრივია, ეჭვი არის, რომ არამიზნობრივი ხარჯვა ხდებოდა თანხის, თუნდაც ახალციხის ციხის მშენებლობის დროს. სადაც იქნება კანონდარღვევა, შესაბამისი რეაგირებაც მოყვება. დადგება კონკრეტული ადამიანების პასუხისმგებლობის საკითხი და ყველა ასეთი საქმე პროკურატურას გადაეგზავნება. თუმცა, ამის შესახებ მხოლოდ მას შემდეგ შეიძლება ვილაპარაკოთ, რაც აუდიტი დასკვნას დაწერს”.
[თამუნა უჩიძე, ახალციხე]