მუსხსა და ხეოთში გრეიდერს ითხოვენ

სოფელ მუსხამდე მისავლელ ორკილომეტრიან გზაზე გადაადგილება მას შემდეგ გართულდა, რაც გზის გასწორების მიზნით, წინასაარჩევნოდ მთის სილა დაყარეს.

- ’ხიდის აქეთ საშინელი გზაა, ვითომ გაასწორეს სილა დაყარეს, ყინვაში კარგი იყო, ახლა გალღვა და ისეთი ტალახია, მანქანები ვეღარ მოძრაობენ. ვითხოვთ დაგვეხმარონ, მოგვიხრეშონ ან გახვეტონ. ჩვენს გარდა, ამ გზით ზველისა და ჭობარეთის მოსახლეობაც სარგებლობს’, - ამბობს სოფელ მუსხში მცხოვრები ნანა გოგოლაური.

მუსხში დახლოებით 300 ოჯახი ცხოვრობს. როგორც სოფელში ამბობენ, პრობლემები ბევრი აქვთ, მაგრამ ყველაზე პრობლემატური საკითხი გზა და საბავშო ბაღის არარსებობაა.

-’გზა და საბავშვო ბაღი ყველაზე დიდი პრობლემაა სოფელში. ხელმოწერებიც კი შევაგროვეთ, მაგრამ ამ დრომდე არაფერი შეცვლილა’,-ამბობს ხათუნა ინასარიძე.

უგზოობაა მთავრი პრობლემა სოფელ ხეოთში მცხოვრები მოსახლეობისთვისაც. ადგილობრივები ამბობენ, რომ ცუდი გზის გამო სამარშუტო ავტობუსებიც იშვიათად დადიან.

- ’ჩვენთან ტრანსპორტს სიარული ზამთარშიც უჭირს და ზაფხულშიც. ავტობუსიც კი არ დადის ყოველდღიურად. ხშირად გვიწევს ქალაქში წასვლა და უტრანსპორტობის გამო სულ პრობლემები გვექმნება’,-გვითხრა ხეოთში მცხოვრებმა პედაგოგმა მაია გორელიშვილმა.

სოფელში ავტობუსი კვირაში მხოლოდ ოთხი დღე დადის (ორშაბათი, ოთხშაბათი, პარასკევი, კვირა) და ისიც დღეში ერთხელ. დილის 8 საათზე გამოსული ავტობუსი სოფელში 4 საათისთვის ბრუნდება. ხეოთელებს ხშირად რამდენიმე კილომეტრის გავლა ფეხით უწევთ.

- ’აბიტურიენტი ვარ და ახალციხეში ინგლისურის მასწავლებელთან დავდივარ. ისეთ დღეებში მაქვს მეცადინეობა, როცა ავტობუსი არ დადის’,-გვითხრა მარიამ ნებაძემ.

ამ სოფლების ტერიტორიული ორგანოს რწმუნებულმა ბადრი ზაზაძემ პრობლემის შესახებ ახალციხის მუნიციპალიტეტის გამგეობის ტრადიციულ თათბირზე ისაუბრა და გზების გასაწმენდად გრეიდერის გამოყოფა ითხოვა.

- ’ჩემი პირველი პრიორიტეტი არის გზების პრობლემა მოვუგვარო სოფლებს. ამიტომ ვითხოვე თათბირზე, რომ გრეიდერის საშუალებით გაგვიწიმინდონ გზები’, - განგვიმარტა ზაზაძემ.

სოფელ ხეოთიდან ურავლამდე ოთხი კილომეტრია, ხოლო ურავლიდან მუსხამდე ორი კილომეტრი. რწმუნებული ვერ აკონკრეტებს რა თანხა დასჭირდება გზების რეაბილიტაციას.

ბადრი ზაზაძე ამბობს, რომ გზების გაწმენდა უახლოეს დღეებში დაიწყება.

- ’ტექნიკა სხვა სოფლებში მუშაობდა და ამ დროისთვის გაფუჭებულია. შეკეთების შემდეგ ხეოთის და მუსხის გზების გაწმენდას დაიწყებს’, -გვითხრა მან.

[თინათინ ზაზაძე, ახალციხე]