რა დაავალა თამარ გოგოლაძემ სოფლის რწმუნებულებს

ახალციხის მუნიციპალიტეტის გამგებლის მოადგილე,’რესპუბლიკელი’ თამარ გოგოლაძე, რწმუნებულებთან ერთად მუნიციპალიტეტის სოფლების შემოვლას გეგმავს.

მისი დავალებით, გამგეობის რწმუნებულებმა მათ ტერიტორიულ გაერთიანებებში [სოფელი ან თემი] არსებული პრობლემების შესახებ ინფორმაცია უკვე შეაგროვეს.

რწმუნებულების თქმით, ყველა სოფელში პრობლემები მეტ-ნაკლებად იდენტურია. სოფელში მცხოვრები მოსახლეობა გზების შეკეთებას, სასმელი წყლის ქსელის რეაბილიტაციას, საბავშვო ბაღებისა და კულტურის სახლის ამოქმედება-რეაბილიტაციას, სასაფლაოების შემოღობვას, ნაპირსამაგრი სამუშაოების და სარწყავი სისტემების მოწესრიგებას ითხოვს.

- ’წყალი და გზა, ეს არის ჩვენი მთავარი სატკივარი. არა მარტო ჩვენი, მთელი მუნიციპალიტეტის’, - გვითხრა სოფელ სვირის ტერიტორიული ორგანოს რწმუნებულმა რამაზ ზედგინიძემ.

სოფლის ტერიტორიული რგანოს რწმუნებულებმა მუნიციპალიტეტის 47-ვე სოფლის შესახებ გამგებლის მოადგილეს ინფორმაცია წერილობით ჩააბარეს.

- ’23 სხვადასხვა სახის პრობლემა გამოვლინდა. ძნელია ერთდროულად ყველა მოგვარდეს, ამიტომ პრიორიტეტი უნდა დავსახოთ. პირადად შევხვდებით მოსახლეობას და გავარკვევთ, რომელი საკითხის მოგვარება უფრო მნიშვნელოვანია’, - ამბობს თამარ გოგოლაძე.

მოსახლეობასთან შეხვედრებს გამგებლის მოადგილე უახლოეს დღეებში დაიწყებს.

[თინათინ ზაზაძე, ახალციხე]