აწყვიტაში შიდა გზების რეაბილიტაციას ითხოვენ

„ბავშვები ვერ გამოგვიშვია გარეთ ისეთ დღეშია გზები. როცა წვიმა მოდის გადაადგილება შეუძლებელი ხდება, რამდნჯერ ვუთხარით მერიას, მაგრამ ყურად არავის უღია, რა აზრი აქვს ჩვენს ლაპარაკს?!“, - გვეუბნება ადგილობრივი ლევან დიასამნიძე.

აწყვიტაში ამბობენ, რომ ბოლო წლებში სოფლამდე მისასვლელი გზები ორი მიმართულებით მოასფალტდა თუმცა, შიდა ქუჩები ისევ მოუწესრიგებელია.

გარდა ამისა, ადგილობრივების პრობლემაა სანიაღვრე არხებიც, რომელიც წვიმის დროს წყალს ვერ იტევს და ისედაც დაზიანებულ გზებზე გადადის.

ასპინძის მუნიციპალიტეტის მერიაში ამბობენ, რომ აწყვიტის შიდა გზის რეაბილიტაციისთვის პროექტი უკვე შედგენილია და გზა სოფლის ცენტრამდე მივა, ამასთან მოეწყობა სანიაღვრე არხებიც.

„დაპროექტებულია ორ კილომეტრამდე შიდა გზის გაკეთება. ახლა პროექტის საბოლოო ვერსიას ველოდებით მერიაში, რომ თანხებიც ვიცოდეთ რა დაგვიჯდება და სამუშაოები დაიწყოს“, - გვიხსნის ასპინძის მერის მოადგილე დავით პაპაშვილი.

აწყვიტაში, მიმდინარე წელს, სოფელ ტოლოშის მხრიდან სოფლამდე მისასვლელი გზის რეაბილიტაცია განხორციელდა, რომელიც ადგილობრივებისთვის წლების განმავლობაში პრობლემა იყო.

[ლუბა გიორგაძე, ასპინძა]