ადიგენი–მოხის მიმართულებით მოსახლეობა გზის გაწმენდას ითხოვს

30 იანვარს მოსული უხვი თოვლის გამო, ადიგენი–მოხის მიმართულებით საავტომობილო გზაზე გადაადგილება შეზღუდულია. ადგილობრივები ამბობენ, რომ უკვე მეორე დღეა მათ დასახლებებში გზის გასაწმენდად სპეცტექნიკა არ მისულა. უგზოობის გამო, გადაადგილების პრობლემა დაახლოებით შვიდი სოფლის: ჭეჭლას, კეხოვანის, საირმეს, ჭელას, მოხეს, ციხისუბნისა და ნამინაურის მცხოვრებლებს აქვთ.

"ორი დღეა საერთოდ გზა არ გაწმენდილა, დღეს გვინდოდა ასპინძაში, დაკრძალვაზე წასვლა, მაგრამ მანქანა ვერ ამოვიდა ადიგენიდან, რომ წავსულიყავით. გვაინტერესებს რატომ არ წმენდს გამგეობა ამ გზას, ორი დღე გავიდა და მხოლოდ მაღალი გამავლობის მანქანები დადიან ჩვენთან"– ამბობს სოფელ ჭელის მცხოვრები ჯამბულ აბულაძე.

მიუხედავად ამისა, უკვე მეორე დღეა, ადიგენის ადგილობრივ თვითმმართველობაში ამბობენ, რომ თოვლის გამო, გადაადგილების პრობლემა არცერთ სოფელს არ აქვს.

„ყველა სოფელში მისასველელი გზა გახსნილია, ყოველ შემთხვევაში, ჩაკეტილი არსად არ არის. გადაადგილებას შეძლებენ. გუშინაც მთელი ღამის განმავლობაში იწმინდებოდა“ – განმარტა ადიგენის მუნიციპალიტეტის გამგეობის საზოგადოებასთან ურთიერთობის სამსახურის წარმომადგენელმა მამუკა კალანდაძემ.

ჭეჭლისა და მოხის ტერიტორიული ორგანოების რწმუნებულები კი ამბობენ, რომ გზების გასაწმენდად სპეცტექნიკას დღეს, 31 იანვარს ელოდებიან.

[თაკო ფეიქრიშვილი, ადიგენი]