წირელები გზის შეკეთებას ითხოვენ

ერთი კვირაა სოფელ წირაში მცხოვრებ მოსწავლეებს წყრუთის სკოლაში ფეხით უწევთ სიარული. სოფლებს შორის მისასვლელ გზაზე თიხიანი მიწის გამო მანქანები ვეღარ დადიან. მოსახლეობა დაზიანებული მონაკვეთის აღგენას ითხოვს.

- ”დაახლოებით 2,50 კილომეტრი ძალიან ცუდ მდგომარეობაშია. თიხიანი ადგილია და აქ სერიოზული სამუშაოებია ჩასატარებელი”,-გვითხრა წყრუთის ტერიტორიული ორგანოს რწმუნებულმა ხაჩო ჩახოიანმა.

რწმუნებულმა საკითხი ორშაბათის თათბირზე განიხილა და მუნიციპალიტეტის ხელმძღვანელობისგან დახმარების პირობა მიიღო.

გამგეობაში ამბობენ, რომ დაზიანებული გზის მონაკვეთის შეკეთებას მაშინ დაიწყებენ, როცა დათბება. მანამდე კი შედგება ხარჯთაღრიცხვა. გამგეობაში ვარაუდობენ, რომ ჩასატარებელი სამუშაოები დაახლოებით 50 000 ლარი დაჯდება.

- "წლებია ეს პრობლემა დგას. ერთჯერადად გაწმენდნენ გზას და შემდეგ ისევ იგივე პრობლემა რჩება. ეხლა კაპიტალურად გაკეთდება. გაიწმნიდება, მოიხრეშება და სანიაღვრე სისტემაც მოეწყობა, რომ მომავალში მსგავსი პრობლემა აღარ შეიქმნას. სამუშაოები მაშინ დაიწყება, როგორც კი ამინდი ხელს შეგვიწყობს”, - გვითხრა მუნიციპალიტეტის გამგებელმა ბესიკ ხითარიშვილმა.

[თინათინ ზაზაძე, ახალციხე]