დღეს ვლადიმერ ზედგინიძე, ქალაქ ახალციხის საკრებულოს დეპუტატების წინაშე წარსდგება. სხდომა მერიაში 15:00 საათზეა ჩანიშნული.
როგორი იქნება ახალი მერის პირველი ნაბიჯები, ამ თემაზე საუბრისგან ვლადიმერ ზედგინიძე თავს იკავებს: „პირველ დღეს, რომ შევალ კაბინეტში და გავერკვევი რიგ საკითხებში, ამის შემდეგ შემეძლება თქმა რა გაკეთდება და რა არა. წინასწარ საუბარი ცოტა უხერხულია. საერთო ჯამში თუ დავუკვირდებით, 9 თვე მიწევს მუშაობა, ამ პერიოდში რის გაკეთებაც შეიძლება, შევეცდები აუცილებლად გავაკეთო“.
ვლადიმერ ზედგინიძე, თვითმმართველი ქალაქის, ახალციხის რიგით მეორე მერია. იგი ამომრჩეველმა რიგგარეშე არჩევნებზე აირჩია. რიგგარეშე არჩევნები კი იმის გამო
დაინიშნა, რომ ყოფილა მერმა, გიორგი კოპაძემ, მაჟორიტარულ არჩევნებში მიიღო მონაწილეობა და
მერის პოზიცია დატოვა. იგი მე–9 მოწვევის პარლამენტში, ახალციხე–ადიგენის მაჟორიტარული
ოლქის დეპუტატი იქნება.
ვლადიმერ ზედგინიძემ ახალციხეს თვითმმართველობის შემდეგ არჩევნებამდე დარჩენილი დროით უნდა უხელმძღვანელოს. ეს არჩევნები კი, როგორც საქართველოს ცენტრალურ საარჩევნო კომისიაში გვიხსნიან, 2017 წლის ოქტომბრამდე უნდა ჩატარდეს.
ახალციხის ახალარჩეული მერი, რომელსაც ამ პოზიციის დასაკავებლად, არჩევნების ორი ტურის გადალახვა მოუწია, 36 წლის განმავლობაში სამართალდამცავ სტრუქტურებში მუშაობდა.
ვლადიმერ ზედგინიძე 1948 წლის 8 მარტს, ბორჯომში დაიბადა.სკოლის დასრულების შემდეგ დაამთავრა თბილისის ივანე ჯავახიშვილის სახელობის უნივერსიტეტის ორი: ისტორიული (1969 წელს) და იურიდიული (1980 წელს) ფაკულტეტი. იყო სკოლის პედაგოგი. ახალციხეში საცხოვრებლად 1981 წლის თებერვლიდან გადმოვიდა.
1985-1995 წლებში შსს-ს ბორჯომისა და ახალციხის რაიონულ განყოფილებაში იყო, ასევე მუშაობდა წალკის მილიციის უფროსად;
1995-2005 წლებში რეგიონის პოლიციის სამმართველოს უფროსის მოადგილე და რეგიონის ადმინისტრაციის უფროსი იყო.
2005 წლიდან დღემდე კლინიკა „ჯანმრთელობის სახლის“ („ნათია 777“) დამფუძნებელი და მენეჯერია. ამბობს, რომ როგორც კი მერად მუშაობას შეუდგება, კლინიკას შვილს გადააბარებს.
ამჟამად იგი სამცხე-ჯავახეთის სახელმწიფო უნივერსიტეტში იურიდიულ ფაკულტეტზე მიწვეული პედაგოგია.
ჰყავს ორი შვილი და ექვსი შვილიშვილი.
შეგახსნებთ, ახალციხის მერის რიგგარეშე არჩევნებში, ხუთი კანდიდატი მონაწილეობდა. პირველ ტურში, ამომრჩევლის ხმათა 50%+1 ვერცერთმა მათგანმა აიღო, ამიტომ, მეორე ტური დაინიშნა.
მეორე ტურში ერთმანეთს „ერთიანი ნაციონალური მოძრაობის“ კანდიდატი ირაკლი ერეკლიშვილი და „ქართული ოცნების“ კანდიდატი ვლადიმერ ზედგინიძე დაუპირისპირდნენ. პირველ ტურში ახალციხის 13 საარჩევნო უბნიდან, 11–ე ვლადიმერ ზედგინიძეს ირაკლი ერეკლიშვილმა მოუგო, შედეგი ასეთი იყო:
N5 ირაკლი ერეკლიშვილი – 49.98%
N41 ვლადიმერ ზედგინიძე – 36.99%.
მეორე ტურში კი , არჩევნები 13–ვე უბანზე ვლადიმერ ზედგინიძემ
მოიგო და შედეგებით: N41 ვლადიმერ ზედგინიძე – 63.22% (4504 ხმა); N5 ირაკლი ერეკლიშვილი – 36.78% (2620 ხმა), ქალაქის მერი ვლადიმერ ზედგინიძე გახდა.
[თინათინ ზაზაძე, ახალციხე]