ახალციხე მერის მოლოდინში – როდიდან დაიწყებს მუშაობას ახალარჩეული მერი

საქართველოს საარჩევნო კოდექსის 135–ე მუხლის თანახმად, თვითმმართველი ქალაქის მერის უფლებამოსილების ვადამდე შეწყვეტის შემთხვევაში, ახალარჩეული მერის უფლებამოსილება შესაბამისი საარჩევნო კომისიის მიერ არჩევნების შედეგების შემაჯამებელი ოქმის შედგენიდან მე-11 დღეს იწყება.

N37–ე ახალციხის საოლქო საარჩევნო კომისიაში განმარტავენ, რომ არჩევნების შემაჯამებელი ოქმის შედგენას დღეს, 8 ნოემბერს, დღის ბოლომდე დაასრულებენ.

„შევაჯამებთ და დამოწმებულს გავუგზავნით მერიის საკრებულოს“, – ამბობს N37–ე ახალციხის საოლქო საარჩევნო კომისიის თავმჯდომარე თეა გავაშელი და აქვე ამატებს, რომ შემაჯამებელი ოქმის დაწერის ვადა 11 ნოემბრამდე ჰქონდათ.

საარჩევნო კოდექსის თანახმად, ამავე დღეს შეუწყდება უფლებამოსილება მერის დროებით მოვალეობის შემსრულებელს. შეგახსენებთ, რომ ამ პოზიციას ილია ზარდიაშვილი იკავებს.

შეგახსენებთ, ახალციხეში მერის რიგგარეშე არჩევნები მას შემდეგ დაინიშნა, რაც ყოფილმა მერმა საპარამენტო არჩევნებში იყარა კენჭი და ამის გამო მერის პოზიცია დატოვა.

ახალციხის მერობისთვის ხუთი კანდიდატი იბრძოდა, ამათგან, პირველ ტურში 50%+1 ხმა ვერცერთმა მათგანმა მიიღო და მეორე ტური დაინიშნა. მეორე ტურში ორი კანდიდატი გავიდა, ვლადიმერ ზედგინიძე, „ქართული ოცნებიდან“ და ირაკლი ერეკლიშვილი „ერთიანი ნაციონალური მოძრაობიდან“. პირველ ტურში არჩევნებში ერეკლიშვილი ლიდერობდა, მას ხმების 49.98% ჰქონდა, ზედგინიძეს კი 36.99%. მეორე ტურში ვითარება „ქართული ოცნების“ კანდიდატის სასარგებლოდ შეიცვალა. საბოლოოდ, მერის რიგგარეშე არჩევნებში, ვლადიმერ ზედგინიძემ გაიმარჯვა. მან ხმების 63.22% მიიღო, ერეკლიშვილმა კი 36.78% .

ვლადიმერ ზედგინიძე ახალციხის მერი თვითმმართველობის შემდგომ არჩევნებამდე დარჩენილი ვადით იქნება. შეგახსენებთ, ადგილობრივი თვითმმართველობის არჩევნები 4 წელიწადში ერთხელ იმართება, ბოლო არჩევნები 2014 წლის 15 ივნისს გაიმართა.

[თინათინ ზაზაძე, ახალციხე]