ახალციხის მერობის კანდიდატი ‘ქართული ოცნებიდან’ ვლადიმერ ზედგინიძეა

ზედგინიძემ დასარეგისტრირებლად N37–ე ახალციხის საოლქო საარჩევნო კომისიას, დღეს, 8 სექტემბერს მიმართა. შეგახსენებთ, დღეს სუბიექტებისთვის რეგისტაციის ბოლო ვადა იყო.

„წარმოვადგენ ჩემს პროგრამას და რის გაკეთებას ვაპირებ ამაზე იქ ვისაუბრებ ვრცლად. აქამდე თავი არ შემირცხვენია და არც ახლა შევირცხვენ“, – აცხადებს ზედგინიძე.

ვლადიმერ ზედგინიძე ყოფილი პოლოციელია. იგი სხვადასხვა დროს, შინაგან საქმეთა სამინისტროს სხვადასხვა ორგანოებში მუშოაბდა. ჯამში სამართალდამცავ სტრუქტურებში 36 წელიწადი მუშაობდა.

1985-1995 წლებში შსს-ს ბორჯომისა და ახალციხის რაიონულ განყოფილებაში იყო, ასევე მუშაობდა წალკის მილიციის უფროსადაც;
1995-2005 წლებში რეგიონის პოლიციის სამმართველოს უფროსის მოადგილე და რეგიონის ადმინისტრაციის უფროსი იყო.

ვლადიმერ ზედგინიძე 1948 წლის 8 მარტს, ბორჯომში დაიბადა.სკოლის დასრულების შემდეგ დაამთავრა თბილისის ივანე ჯავახიშვილის სახელობის უნივერსიტეტის ორი: ისტორიული (1969 წელს) და იურიდიული (1980 წელს) ფაკულტეტი. იყო სკოლის პედაგოგი. ახალციხეში საცხოვრებლად 1981 წლის თებერვლიდან გადმოვიდა.

ამჟამად იგი სამცხე-ჯავახეთის სახელმწიფო უნივერსიტეტში იურიდიულ ფაკულტეტზე მიწვეული პედაგოგია. 2005 წლიდან კი კლინიკა „ჯანმრთელობის სახლის“ („ნათია 777“) დამფუძნებელი და მენეჯერი.

ჰყავს ორი შვილი და ექვსი შვილიშვილი.

აქვე შეგახსენებთ, წელს ვლადიმერ ზედგინიძე იყო ერთ–ერთი იმ 10 მოქალაქეს შორის, რომლებიდანაც ახალციხის საპატიო მოქალაქეებს არჩევდნენ.

ამ დრომდე ახალციხის მერობის კანდიდატებად მოიაზრებიან:

ბესიკ ტაბატაძე – „პატრიოტთა ალიანსიდან“;
ირაკლი ერეკლიშვილი – „ნაციონალური მოძრაობიდან“;
ჯუმბერ ინასარიძე – „ეროვნული ფორუმიდან“;
ივანე გვარამაძე – ბლოკიდან “პაატა ბურჭულაძე – სახელმწიფო ხალხისთვის”;
ვლადიმერ ზედგინიძე – ‘ქართული ოცნებიდან“.

ვინ დაემატება, ან რა შეიცვლება ამ სიაში, დღეს, 18:00 საათის შემდეგ გაირკვევა. დღეს სუბიექტებს საოლქო კომისიებისთვის მიმართვის ბოლო ვადა ჰქონდათ. საოლქომ დოკუმენტაცია 2 დღის ვადაში უნდა შეისწავლოს. საბოლოო სია, ვინ იბრძოლებს ახალციხის მერობისთვის, 2 დღეში გახდება ცნობილი.

[თამუნა უჩიძე, ახალციხე]