ახალციხეში ენერგოეფექტურობის საერთაშორისო დღეს აღნიშნავენ

ამ დღის აღსანიშნავად, სამცხე-ჯავახეთის სახელმწიფო უნივერსიტეტის სტუდენტები, უნივერსიტეტიდან ცენტრალურ პარკამდე, ფეხით მსველობას მოაწყობენ და მოსახლეობას, ენერგოეფექტიანობის შესახებ საინფორმაციო ბუკლეტებს დაურიგებენ.

დღის აღნიშვნა ახალციხის ადმინისტრაციული შენობის სხდომათა დარბაზში გაგრძელდება, სადაც ახალციხის ახალგაზრდული ცენტრის დირექტორი მაკა სუდაძე ენერგოეფექტიანობის შესახებ პროექტის მოკლე პრეზენტაციას გამართავს. ენერგოდაზღვევის შესახებ პრეზენტაციას გამართავს საზოგადოებრივი განვითრების ახალციხის ცენტრის დირექტორი ნუგზარ თათეშვილიც.

ასევე, ადმინისტრაციულ შენობაში, სამოქალაქო განათლების პროგრამა „მომავლის თაობის“ მონაწილე კერძო სკოლა „მზექას“ მოსწავლეები ენერგოეფექტიანობის შესახებ თემებს წარმოადგენენ. მოეწყობა, თემატური საკონკურსო ნახატების „ენერგოეფექტურობა და მე“ გამოფენაც, სადაც მოწვეული სტუმრები სპეციალური სტიკერებით საუკეთესო ნახატს აირჩევენ. გამარჯვებულებს სერთიფიკატები გადაეცემათ.

ადმინისტრაციულ შენობაში ღონისძიებას უნივერსიტეტის სტუდენტები და კერძო სკოლა „მზექას“ მოსწავლეები, ასევე ადგილობრივი თვითმართველობისა და არასამთავრობო ორგანიზაციების წარმომადგენლები დაესწრებიან.

პარალელურად, სამცხე-ჯავახეთის სახელმწიფო უნივერსიტეტის სტუდენტების მონაწილეობით, ახალციხის ტბის ტერიტორიაზე მოეწყობა ველორბოლა.

ღონისძიების დასასრულს კი, ახალციხის მერიისა და არასამთავრობო სექტორის წარმომადგენლების მონაწილეობით, პროექტის ფარგლებში სამცხე-ჯავახეთში ენერგოეფექტურობის შესახებ, სტუდენტებისათვის გამოცხადებული კონკურსის მარკეტინგული კვლევის სტრატეგიის შედეგებს შაჯამებენ და გამარჯვებულებს გამოავლენენ.

[sknews.ge]