ახალგაზრდულმა ცენტრმა პროგრამა ‘მომავლის თაობა’ შეაჯამა

ახალციხის ახალგაზრდული ცენტრის დირექტორმა მაკა სუდაძემ ღონისძიების დასაწყისში პროგრამის ფარგლებში განხორციელებულ აქტივობებზე ისაუბრა.

მისი თქმით, ერთი წლის განმავლობაში პროგრამის ფარგლებში რეგიონში 7 მცირე გრანტი გაიცა, სოციალური მედიის პროგრამის ფარგლებში დაჯილდოვდა 17 ახალგაზრდა, პროექტში მონაწილე ბავშვები სისტემატურად ხვდებოდნენ ადგილობრივ თვითმმართველობის წარმომადგენლებს, პოეტებს, მწერლებს, იურისტებს. მოსწავლეებმა საკუთარ სკოლებში მოაწყეს სკვერები, გაამწვანეს მეწყერსაშიში ზონები, დაეხმარნენ მიუსაფარ ახალგაზრდებს, დაასუფთავეს როგორც სოფლის მიმდებარე ტერიტორიები, ისე მდინარეების სანაპიროები.

„ვფიქრობ, რომ იმის გათვალისწინებით, რომ წელს პირველი წელი იყო, მაინც საკმაოდ შთამბეჭდავი შედეგები მივიღეთ. ეს პროგრამა მომავალშიც გაგრძელდება და იმედი მაქვს, რომ უფრო აქტიური იქნება ჩვენი ქმედებები“, – განაცხადა მაკა სუდაძემ.

პროგრამის შეჯამების შემდეგ, რეგიონში პედაგოგთა ფორუმის სამცხე – ჯავახეთის კოორდინატორმა ნინო ნადირაძემ, რეგიონში სამოქალაქო განათლების პედაგოგთა პროფესიული განათლებისა და ფორუმის ფარგლებში მიმდინარე აქტივობების პრეზენტაცია გამართა.

ნადირაძის შემდეგ, ტრიბუნა კერძო სკოლა „მზექას“ მოსწავლეებს დაეთმოთ. „რომ არ დავკარგოთ ბავშვები“ – ასე ერქვა მათ პრეზენტაციას. „ერთად ვიზრუნოთ მომავალზე“ – ამ სახელწოდებით პრეზენტაცია ასპინძის მუნიციპალიტეტის სოფელ ნაქალაქევის საჯარო სკოლის მოსწავლეებმა მოამზადეს.

პრეზენტაციების დასრულების შემდეგ ახალციხის მერის მოადგილემ ზაზა თამარაშვილმა კერძო სკოლა „მზექას“ მოსწავლეებს ხმის გამაძლიერებელი აპარატურა გადასცა.

შემაჯამებელ პრეზენტაციას ადგილობრივი თვითმმართველობის წარმომადგენლები, არასამთავრობო ორგანიზაციის ხელმძღვანელები და საგანმანათლებლო რესურსცენტრების დირექტორები ესწრებოდნენ.

ღონისძიება მცირე გრანტების კოორდინატორმა ინგა ქიბროწაშვილმა შეაჯამა. მან ტექნიკის კონკურსში გამარჯვებული საჯარო სკოლები სიგელებით დააჯილდოვა.

„ამ ერთი წლის განმავლობაში საკმოდ ბევრი აქტივობა განხორციელდა. ვფიქრობ, რომ ძალიან საინტერესო წელი იყო პროგრამისთვის“, – ამბობს ინგა ქიბროწაშვილი.

ღონისძიების ბოლოს ახალციხის ახალგაზდული ცენტრის დირექტორმა მაკა სუდაძემ მადლიერების სერთიფიკატები და ფასიანი საჩუქრები გადასცა სოფლების ეშტიისა და პატარა კონდურას საჯარო სკოლებსა და ახალციხის კერძო სკოლა „მზექას“.

აქტიური თანამშრომლობისთვის მადლიერების სერთიფიკატები გადაეცათ ასპინძის მუნიციპალიტეტის გამგეობასა და ადგილობრივ მედიასაშუალებებს, რეგიონულ გაზეთს „სამხრეთის კარიბჭესა“ და ტელეკომპანია „მე–9 არხს“.

სამოქალაქო განათლების პროგრამა, „მომავლის თაობის“ განხორციელება 2014 წლის ნოემბერში, აშშ–ს საერთაშორისო განვითარების სააგენტოს დაფინანსებით დაიწყო. ახალციხეში პროგრამის პარტნიორი ახალციხის ახალგაზრდული ცენტრია. პროგრამაში 42 სკოლაა ჩართული.

პროგრამას მხარს უჭერს საქართველოს განათლებისა და მეცნიერების სამინისტრო. პროგრამა სამი წლის მანძილზე გაგრძელდება და მთელი საქართველოს მასშტაბით 480 სკოლასთან იმუშავებს.



[მანანა სარაშვილი, ახალციხე]