„ვეფხისტყაოსნის“ ხელნაწერი ვერსიის შექმნაში მესხეთი ჩაერთო

შოთა რუსთაველის 850 წლის იუბილესთან დაკავშირებით, ქვეყნის მასშტაბით ხორცილდება პროექტი „სჯობს სახელისა მოხვეჭა, ყოვლისა მოსახვეჭელსა“ . იგი პოემის თითოეული სტროფის კალმით გადაწერას გულისხმობს, საბოლოოდ კი ხელნაწერები ერთ წიგნად შეიკვრება.
პროექტი ჭიათურის მუნიციპალიტეტის დაფინანსებით ხორციელდება, მისი ავტორი ჟურნალისტი მაია ტყემელაძეა.

პროექტის ფარგლებში, ერთი ადამიანი, „ვეფხისტყაოსნის“ ერთ სტროფს წერს. ამ დრომდე, ხელნაწერები შეგროვდა საჩხერე–ჭიათურის სოფლებსა და ქალაქებში, ასევე თბილისში. პოემის 41 სტროფი კი მესხეთში ჩაიწერა.

სამცხე–ჯავახეთში „ვეფხისტყაოსნის“ ხელნაწერები, პოეტმა და პროექტის თანაშემწემ, ციური ასპანიძე–მესხიშვილმა შეაგროვა.

„მერგო პატივი, რომ ეს ფურცლები წამომეღო მესხეთში. მანამდე მე ქალბატონმა მაიამ ტყემალაძემ მიმიწივია ჩასაწერად მოსწავლე–ახალგაზრდობის სასახლეში, როგორც მესხეთის წარმომადგენელი. ძალიან გულდაწვეტილები დარჩნენ ადამიანები, რომ არ იყო საკმარისი სტროფები. აქედან გაჩნდა უკვე იდეა ჩემში, რომ როგორმე მოვახერხო და გავაკეთო იგივე პროექტი, თუ ფინანსური დახმარება იქნება“, – ამბობს ციური ასპანიძე მესხიშვილი.

მესხეთში პირველი ჩანაწერი მამა სტეფანე ნადირაძემ გააკეთა, რომელიც ქალაქის საპატიო მოქალაქეც არის. „ვეფხისტყაოსნის“ სტროფები კალმით გადაწერეს სამცხე–ჯავახეთის სახელმწიფო უნივერსიტეტის რექტორმა მერაბ ბერიძემ, გაზეთ „ლიტერატურული მესხეთის“ რედაქტორმა ავთანდილ ბერიძემ, ვალის საჯარო სკოლის ასაკოვანმა პედაგოგებმა, ახალციხის ციხის დირექტორმა ზაზა თამარაშვილმა, ომარ ჯაყელმა და სხვებმა.

ისტორიული წიგნის შედგენაში საკუთარი წვლილი „სამხრეთის კარიბჭემაც“ შეიტანა. პოემის ერთი სტროფი სპეციალურ ფორმატზე ჟურნალისტმა თიკო ზაზაძემ გადაიტანა.

პროექტი "სჯობს სახელისა მოხვეჭა, ყოვლისა მოსახვეჭელსა“ 2016 წლის იანვრის თვიდან ხორციელდება. თუმცა მანამდე მსგავსი პროექტს მწერალ დავით კვიცარიძემ ქალაქ ქუთაისში დაიწყო.

პროექტის მიზანია შოთა რუსთაველის შემოქმედების, გენიალური პოემის, ქართული ანბანის პოპულარიზაცია, მის გარშემო ყველა თაობის ადამიანის შემოკრება და გაერთიანება; ხელნაწერი „ვეფხისტყაოსნის“ საზეიმო წარდგენა სექტემბრის ბოლოს გაიმართება. აღსანიშნავია, 2016 წელი გაერომ, მწერლის იუბილესთან დაკავშირებით, შოთა რუსთაველის წლად გამოაცხადა.



[თაკო ფეიქრიშვილი, ახალციხე]