დღეს ვარძიაში 'ვეფხისტყაოსნის' სტროფებს გადაწერენ

კულტურის სამინისტროს ცნობით, ხელნაკეთი წიგნი საქართველოს დედაქალაქსა და რეგიონებში 15 მაისიდან 26 მაისის ჩათვლით იმოგზაურებს. 21–ე საუკუნის ხელნაწერი „ვეფხისტყაოსნის“ შექმნაში მონაწილეობის მიღება ყველა მსურველს შეეძლება. პოემის გადაწერა საზეიმოდ 26 მაისს თბილისში, რუსთაველის გამზირზე, რუსთაველის თეატრის წინ დასრულდება.

ღონისძიება "რუსთაველის დღეების" ფარგლებში იმართება. „რუსთაველის დღეების“ აღნიშვნა ახალციხეში გუშინ, 15 მაისს, 14:00 საათზე დაიწყო. ღონისძიებებს ესწრება საქართველოს კულტურისა და ძეგლთა დაცვის მინისტრი მიხეილ გიორგაძე.

გუშინ, ახალციხეში, ახალციხეში რუსთაველის დღისადმი მიძღვნილი ღონისძიებების ფარგლებში, მოეწყო სხვადასხვა ენაზე გამოცემული „ვეფხისტყაოსნის“ თარგმანებისა და სომხურ ენაზე გამოცემული ქართველი მწერლების ნაწარმოებების პრეზენტაციები; მხატვარ ქეთი მატაბელის, ახალგაზრდა მხატვრების და ფოტოხელოვანების ნამუშევრების გამოფენა, „ვეფხისტყაოსნის“ საჯარო კითხვა და საჯარო სკოლებში ღია გაკვეთილები თემაზე - რუსთაველი ლადო გუდიაშვილისა და სერგო ქობულაძის შემოქმედებაში.

ასევე, მოეწყო მეცნიერების (რუსთველოლოგების) - ირმა რატიანის, მაკა ელბაქიძის, ივანე ამირხანაშვილის, ნესტან სულავას, მწერალთა კავშირისა და შოთა რუსთაველის ფონდის თავმჯდომარეების - მაყვალა გონაშვილისა და ავთანდილ ბერიძის შეხვედრა ადგილობრივ მოსახლეობასთან, სტუდენტებთან, უფროსკლასელებთან, საქართველოს სხვადასხვა რეგიონიდან ჩასულ სტუმრებთან; შოთა რუსთაველის თემატიკაზე გაიმართა სემინარი და ინტერაქციის რეჟიმში შედგა დიალოგი მკითხველთან.

ღონისძიება ფოლკლორული ანსამბლის „მესხეთი“ და მომღერალ ნეკა სებისკვერაძის კონცერტით დასრულდა.

ახალციხეში რუსთაველის დღისადმი მიძღვნილი ღონისძიებები პროექტის „მრავალფეროვანი საქართველო“ ფარგლებში იმართება, რომლის მხარდამჭერიც საქართველოს კულტურისა და ძეგლთა დაცვის სამინისტროა. ადგილობრივ ბიბლიოთეკებს საჩუქრად სამინისტროს ხელშეწყობით გამოცემული წიგნებიც გადაეცა.

[sknews.ge]