„ვეფხისტყაოსნის“ ზეპირად მცოდნეების კონკურსის გამარჯვებულები გამოვლინდნენ

სამცხე–ჯავახეთის სახელმწიფო უნივერსიტეტში „ვეფხისტყაოსნის“ ზეპირად მცოდნეების კონკურსში მონაწილეობას ექვსი კონკურსანტი იღებდა. საპრიზო ადგილები კი ოთხ მათგანზე გადანაწილდა.

„თითოეულ მათგანს უცხო ენაზე უნდა წარმოედგინა 10 სტროფი, შემდეგ ჟიურის მიერ შერჩეულ თემაზე დაეწერათ ესეები, ბოლოს კი ზეპირად თქმაში ეჯიბრებოდნენ ერთმანეთს“, – ამბობს „ვეფხისტყაოსნის“ ზეპირად მცოდნეების ჟიურის წევრი მაკა კაჭკაჭაშვილი.

კონკურსში პირველ ადგილზე ანრო ცირეკიძე და მეორეზე ნინო ნესუაშვილი გავიდნენ. მესამე ადგილი კი თინათინ სიყმაშვილმა და ნათელა ლანჩავამ გაინაწილეს. ოთხივე გამარჯვებულს უნივსერიტეტმა ფულადი პრემია გადასცა.

კონკურსში მონაწილეობას 20–ზე მეტი მოსწავლეც იღებდა.

„მათ ზეპირად რამდენიმე სტროფი თქვეს, ბაღდათიდან ერთ–ერთმა მოსწავლემ ზეპირად 500 სტროფი იცოდა. მოსწავლეებში ყველა მონაწილე დაჯილდოვდა“, – ამბობს კაჭკაჭშვილი.

მისი თქმით, მოსწავლეებს კულტურისა და ძეგლთა დაცვის სააგენტომ „ბიბლუსის“ 100 ლარიანი ვაუჩერები გადასცა: „ამ თანხის ფარგლებში მათ მაღაზიაში წიგნების შეძენა შეუძლიათ“.

კონკურსი უნივერსიტეტის მეორე კორპუსში მიმდინარეობდა.

ღონისძიების ორგანიზატორი სამცხე-ჯაცახეთის სახელმწიფო უნივერსიტეტთან ერთად, საქართველოს კულტურული მემკვიდრეობის დაცვის ეროვნული სააგენტოც იყო.

[თამუნა უჩიძე, ახალციხე]