‘ვეფხისტყაოსნის’ ზეპირად მცოდნეებისთვის კონკურსი გამოცხადდა

კონკურსი 2016 წლის 23-24 ივნისს, ახალციხეში ჩატარდება. იგი სამცხე–ჯავახეთის სახელმწიფო უნივერსიტეტისა და კულტურული მემკვიდრეობის დაცვის ეროვნული სააგენტოს ერთობლივი ორგანიზებით გაიმართება.

კონკურსში მონაწილეობის მისაღებად მსურველებისათვის ასაკობრივი ზღვარი შეზღუდული არ არის. საკუთარი ცოდნის წარმოჩენა საქართველოს ფარგლებს გარეთ ქართული დიასპორის წარმომადგენლებსაც შეეძლებათ. ისინი კონკურსში "skype"-ის საშუალებით ჩაერთვებიან.

მსურველებმა კონკურსში მონაწილეობის მისაღებად განაცხადი 10 ივნისამდე უნდა გააგზავნონ, მისამართებზე: aramaterialuri@yahoo.com, bguliko@mail.ru. რეგისტრაციის გავლა შესაძლებელია სატელეფონო ზარითაც, საკონტაქტო ნომრებზე: 599 08 40 03; 599 08 40 14;ან 558 50 48 46.

საკონკურსო დღეს, სამცხე-ჯავახეთის სახელმწიფო უნივერსიტეტში, ჟიურის წევრები მონაწილეთა ცოდნას შეამოწმებენ. საბოლოოდ, „ვეფხისტყაოსნის“ საუკეთესო მცოდნე გამოვლინდება.

2015 წლის 30 სექტემბერს სამცხე-ჯავახეთის სახელმწიფო უნივერსიტეტის სტუდენტების ინიციატივით, "ვეფხისტყაოსნის" ზეპირად ცოდნის ტრადიციას არამატერიალური კულტურული მემკვიდრეობის ძეგლის სტატუსი მიენიჭა. დეკემბრის თვეში კი მოზეპირეთა გამოსავლენად, უმაღლეს საგანმანათლებლო დაწესებულებაში კონკურსი ჩატარდა. პირველი ადგილის მფლობელი ორი მონაწილე: ანრო ცირეკიძე და თემურ ხუციშვილი გახდნენ. "ვეფხისტყაოსნის" მოზეპირეთა კონკურსი სამცხე–ჯავახეთის უნივერტეტმა პირველად 1999 წელს ჩაატარა.

[თაკო ფეიქრიშვილი, ახალციხე]