"ვეფხისტყაოსნის" ზეპირად მთქმელთა კონკურსისათვის მზადება დაიწყო

"ვეფხისტყაოსნის" ზეპირად მთქმელთა კონკურსში ჩართვა საქართველოს საჯარო და კერძო სკოლების მოსწავლეებს შეეძლებათ.
კონკურსს საქართველოს კულტურისა და ძეგლთა დაცვის სამინისტრო სამცხე-ჯავახეთის უნივერსიტეტთან ერთად ახორციელებს. იგი შემოდგომით გაიმართება.

ორგანიზატორების განმარტებით, კონკურსის განსხვავებული ფორმატი ხელს შეუწყობს მრავალწლიანი ტრადიციის ახლებურ გააზრებას და პოემის არსობრივ ცოდნას, რითაც კიდევ ერთხელ გაუსვამს ხაზს კულტურული მემკვიდრეობის მნიშვნელობას საზოგადოების სულიერ ფასეულობათა ჩამოყალიბებაში.

შეგახსენებთ, რომ 2015 წელს საქართველოს კულტურული მემკვიდრეობის დაცვის ეროვნული სააგენტოს და სამცხე-ჯავახეთის სახელმწიფო უნივერსიტეტის თანამშრომლობით, არამატერიალური კულტურის მემკვიდრეობის ძეგლის სტატუსი მიენიჭა "ვეფხისტყაოსნის ზეპირად ცოდნის ტრადიციას".

კონკურსში ჩართვის მსურველებმა ახალციხის მუნიციპალიტეტის გამგეობის კულტურის სამსახურს უნდა მიმართონ.

[sknews.ge]