გოდერძი კუბლაშვილის შემაჯამებელი შეხვედრა ამომრჩეველთან

დღეს, 6 ოქტომბერს, გოდერძი კუბლაშვილმა ბოლო შეხვედრა მესხეთის სახელმწიფო თეატრის შენობაში გამართა. მან რვა კაციან აუდიტორიას საარჩევნო პროგრამა და პრიორიტეტები გააცნო. კანდიდატის თქმით, მისი საარჩევნო პროგრამა ღირსებაზე, ქრისტიანულ სიყვარსულსა და მიმტევებლობაზე, ასევე უკადრებლის არ კადრებზეა დაფუძნებული.

შეხვედრისას, გოდერძი კუბლაშვილმა ყურადღება იმ სამ საკითხზე გაამახვილა, რომლებიც მისი არჩევნებში გამარჯვების შემთხვევაში პრიორიტეტული იქნება: პირველ პრიორიტეტად კანდიდატი განათლების სისტემას ასახელებს. ამბობს, რომ ამ კუთხით ქვეყანაში არასახარბიელო მდგომარეობაა, მისი არჩევნებში გამარჯვების შემდეგ კი განათლების კომიტეტის თავმჯდომარის პოსტზე მუშაობის ამბიცია აქვს.

მისი შემდეგი პრიორიტეტი ადამიანის უფლებების დაცვაა.

„ადამიანის უფლებები შელახულია სამწუხაროდ, განსაკუთრებით ჩვენს რეგიონში. თავზე დაგვაჯდა ყველა. ვისაც არ ეზარება აქ მოდის მმართველად. რასაც ვერ უბედავენ, ვერც იმერეთს, ვერც სამეგრელოს, ვერც გურიას, იმას ბედავენ აი აქ. თქვენ ყველა ძალიან კარგად იცით ადამიანის უფლებები ფეხქვეშ არის გათელილი“, – განმარტა შეხვედრისას გოდერძი კუბლაშვილმა.

მაჟორიტარობის კანდიდატის მესამე პრიორიტეტია – სამთავრობო საქმეებში, არც ადგილობრივ და არც ცენტრალურ დონეზე არ ჩაერიოს და სიტუაცია მხოლოდ აკონტორლოს.

საბოლოოდ, კანდიდატმა წინასაარჩევნო გარემო შეაფასა და აღნიშნა, რომ ამ პერიოდში, მისი კონკურენტები ადიგენი – ახალციხის ოლქში, მასთან დებატებზე უარს ამბობდნენ.

„21–ე საუკუნეში პარლამენტის მაჟორიტარი კანდიდატები ვერ ბედავენ ჩემთან დებატებში მოსვლას. ჩემს კონკურენტებს ასევე ეშინიათ მოსახლეობასთან შეხვედრა. ჩვენმა პარტიამ თავიდანვე განაცხადა, რომ არ გვაქვს ფინანსები, ამიტომ ჩვენი პარტიის წევრების პლაკატი არსად არ არის გაკრული. ლენინის დრო დასრულდა, ადამიანებს აღარ აინტერესებთ პლაკატები, აღიზიანებთ“, – განმარტა გოდერძი კუბლაშვილმა.

მაჟორიტარობის კანდიდატის საარჩევნო პროგრამის გასაცნობად მესხეთის თეატრში დღეს რვა ადამიანი იმყოფებოდა.

"რეალური კანდიდატია, ისეთი პიროვნების პარტიიდან არის, რომ მისაღებია დეპუტატი თუ გახდება. მე ვიცნობ თამაზ მეჭიაურს, ვიცნობ მის პროგრამას და ვიცი მისი გამოცდილება, ამიტომ მომწონს“, – ამბობს შეხვედრის მონაწილე ანზორ ბალახაშვილი.



[თაკო ფეიქრიშვილი, ახალციხე]