შემოვლა პროექტების დასაგეგმად თუ სამსახურეობრივი მანქანის გამოყენება საარჩევნო შეხვედრაზე

ახალციხის მერიის ავტომანქანა. რუსთაველის ქუჩა. 15 სექტემბერი, დაახლ. 18:30 საათი

დღეს, 15 სექტემბერს, საღამოს, დაახლოებით 18:30 საათზე, ახალციხეში, რუსთაველის ქუჩაზე, მესამე საჯარო სკოლის მიმდებარე ტერიტორიაზე მცხოვრებ მოსახლეობას, ახალციხის მერობის კანდიდატი, პარტია „ქართული ოცნებიდან“, ვლადიმერ ზედგინიძე შეხვდა.

იქამდე, ვიდრე ამომრჩევლებთან ვლადიმერ ზედგინიძე მოვიდოდა, ქუჩაზე, სამსახურეობრივი ავტომანქანით, (TOYOTA Land Cruiser Prado, სახელმწიფო ნომრით: AXL-077) ახალციხის მერის მოვალეობის შემსრულებელი ილია ზარდიაშვილი მოვიდა. შეკრებილ ხალხს გასცდა და ქუჩის დასაწყისში გაჩერდა.

ფაქტს „სამხრეთის კარიბჭე“ შეესწრო და ფოტოების გადაღება დაიწყო. როგორც კი ჟურნალისტი შენიშნეს, ილია ზარდიაშვილს „ქართული ოცნების“ შტაბის ხელმძღვანელი გიორგი გვარამაძე მიუახლოვდა, მალევე ზარდიაშვილმა მანქანა დაძრა და ტერიტორია დატოვა. რამდენიმე წუთის შემდეგ, კი ზარდიაშვილი შეხვედრაზე დაბრუნდა, ოღონდ ავტომანქანის გარეშე (ქუჩა, სადაც შეხვედრა იმართებოდა და ადმინისტრაციული შენობა, სადაც მერიაა განათავსებული, ერთმანეთთან ახლოს მდებარეობს, მათ ერთი პარალელური ქუჩა ყოფს. ფეხით დაახლ. 5 წუთის გზა. ს.კ). ამის შემდეგ, ილია ზარდიაშვილი მერობის კანდიდატის მიერ გამართულ შეხვედრას ბოლომდე დაესწრო.

„საერთაშორისო გამჭვირვალობა საქართველოს“ იურისტები განმარტავენ, რომ შეხვედრა არასამუშაო საათებშიც რომ იმართება, საჯარო მოხელეებს მასში მონაწილეობა, სამსახურეობრივი ავტომობილებით, მაინც ეკრძალებათ.

„მერის მოვალეობის შემსრულებელს, ან ნებისმიერ საჯარო მოხელეს, არ აქვს უფლება მივიდეს სამსახურეობრივი ავტომობილით საარჩევნო შეხვედრაზე, თუნდაც არასამუშაო საათებში. ეს ადმინისტრაციული რესურსის გამოყენებაა. 6 საათამდე რომ ყოფილიყო, ეს უკვე აგიტაციაც იქნებოდა“, - ამბობს „საერთშორისო გამჭვირვალობა-საქართველოს“ იურისტი გიგი ჩიხლაძე და ამატებს, რომ ეს საარჩევნო კოდექსის 48–ე მუხლის დარღვევაა.

48-ე მუხლში კი ვკითხულობთ: „წინასაარჩევნო აგიტაციაში მონაწილეობის უფლების მქონე ნებისმიერ პირს წინასაარჩევნო კამპანიის პერიოდში ეკრძალება რომელიმე პოლიტიკური პარტიის, საარჩევნო სუბიექტობის კანდიდატის, საარჩევნო სუბიექტის მხარდასაჭერად ან საწინააღმდეგოდ წინასაარჩევნო აგიტაციისა და კამპანიის პროცესში ადმინისტრაციული რესურსების გამოყენება; მათ შორის სახელმწიფო ხელისუფლების ან ადგილობრივი თვითმართველობის ორგანოების საკუთრებაში არსებული სატრანსპორტო საშუალებების გამოყენება. (48–ე მუხლის პირველი პუნქტის „გ“ ქვეპუნქტი)

კითხვაზე, რატომ მივიდა შეხვედრაზე სამსახურეობრივი ავტომობილით, ილია ზარდიაშვილი გვპასუხობს, რომ კანდიდატის შეხვედრის მომენტში იქ არ ყოფილა და ტერიტორია კანდიდატის მისვლამდე დატოვა: „შეხვედრა სანამ დაწყებულიყო, მანქანა ადმინისტრაციულ შენობასთან წავიყვანე და გავაჩერე. უბრალოდ, მაგ ქუჩაზე პროექტებს ვათვალიერებდი და მანქანით შემოვიარე“.

ამ ეტაპზე აღნიშნულ ქუჩაზე რაიმე პროექტი არ ხორციელდება. კითხვაზე, რომელ პროქტს გულისხმობს, მაშინ, როცა ქუჩაზე რაიმე სამუშაო არ მიმდინარეობს, ზარდიაშვილმა განაცხადა: „ამ კონკრეტულ მონაკვეთზე არ მიმდინარეობს, მაგრამ, მანდ არის დაგეგმილი პროექტები, სადაც შეიძლება ვიზუალურად დავათვალიერო სად რას ვგეგმავ“.


ახალციხის მერიის ავტომანქანა. რუსთაველის ქუჩა. 15 სექტემბერი, დაახლ. 18:30 საათი


მერის მოვალეობის შემსრულებელი ილია ზარდიაშვილი შეხვედრაზე


მერის მოვალეობის შემსრულებელი ილია ზარდიაშვილი შეხვედრაზე

[ლუბა გიორგაძე, ახალციხე]