'რაზეც გესაუბრებით, მეზობლებს გადაეცით და არჩევანი ისე გააკეთონ' – მერობის კანდიდატი ამომრჩევლებს

რუსთაველის ქუჩაზე, მესამე საჯარო სკოლის მიმდებარედ გამართულ შეხვედრას, უმეტესწილად „ქართული ოცნების“ შტაბის წევრები ესწრებოდნენ. შეხვედრაზე იყვნენ ახალციხის მერის მოვალეობის შემსრულებელი ილია ზარდიაშვილი და მისი მოდგილე ზაზა გელაძეც.
შეხვედრას რუსთაველის ქუჩის ამ მონაკვეთის მცხოვრებთა დიდი ნაწილი არ დასწრებია.

„ეტყობა ვერ მოიცალეს, ხდება ხოლმე. რაზეც გესაუბრებით, მეზობლებს გადაეცით და არჩევანი ისე გააკეთონ“, - დაუბარა ვლადიმერ ზედგინიძემ რუსთაველის ქუჩის იმ მოსახლეობას, ვინც შეხვედრაზე იყო.

ვლადიმერ ზედგინიძემ გამოსვლა საკუთარ თავზე საუბრით დაიწყო. თავის წარდგენის შემდეგ, კანდიდატი ადგილობრივებს საკანალიზაციო სისტემის მოწესრიგებას დაჰპირდა. მანვე ქალაქში ოთხი ქუჩის რეაბილიტაციაც დაანონსა, თუმცა, რომელი ქუჩები, არ დაუკონკრეტებია.

„გპირდებით, რომ ოთხი ქუჩა მოეწყობა წლის ბოლომდე. მოვაწყობთ კანალიზაციის სისტემასაც“, - განაცხადა „ქართული ოცნების“ მერობის კანდიდატმა და დაამატა, რომ არცერთი საკითხი ადგილობრივების თანამონაწილეობის გარეშე არ გადაწყდება.

რუსთაველის ქუჩის მოსახლეობას „ქართული ოცნების“ მერობის კანდიდატთან ერთად, მაჟორიტარი დეპუტატობის კანდიდატი გიორგი კოპაძეც უნდა შეხვედროდა. თუმცა, იგი შეხვედრაზე არ გამოჩენილა. როგორც ადგილობრივებს ქალაქის საკრებულოს თავმჯდომარემ დავით ლომიძემ განუმარტა, კოპაძე ქალაქგარეთ იმყოფება და შეხვედრა ამიტომ ვერ მოახერხა.





[ლუბა გიორგაძე, ახალციხე]