ახალციხის მერია ახალ შენობაში გადავიდა

ორ წლიანი ლოდინის შემდეგ, ახალციხის მერია და საკრებულო კოსტავას #18–ში არსებულ შენობაში გადავიდა. სამ სართულიან გარემონტებულ შენობაში მერიის ათი სამსახური, საკრებულო, მისი კომისიები და ფრაქციები განთავსდა.

ახალგარემონტებულ შენობაში პირველ სართულზე 14, მეორეზე და მესამე სართულებზე კი 17–17 ოთახია განთავსებული. მათ შორის ყველაზე მცირე სამუშაო ოთახი, პროექტის მიხედვით, 7–9 კვადრატული მეტრია.

შენობის რეაბილიტაცია 2014 წელს დაიწყო. სარემონტო სამუშაოებისათვის 511 356 ლარი დაიხარჯა. თანხა მუნიციპალური განვითარების ფონდიდან გამოიყო.

როგორც მერის მოვალეობის შემსრულებელი, ილია ზარდიაშვილი განმარტავს, ახალ ადმინისტრაციულ შენობაში გადმოსვლის პროცესი უქმე დღეებს დაამთხვიეს და დღეიდან ყველა სამსახური სრული დატვირთვით მუშაობს.

„სრულად მოხდა მუნიციპალიტეტის ადმინისტრაციული სამსახურების გადმოსვლა. ყველა გადანაწილებულია ოთახებში და ჩვეულ რიტმში აგრძელებენ მუშობას. ადგილობრივ მოსახლეობას ტერიტორიის ცვლილებასთან დაკავშირებით შეფერხება არ ექნება“, – ამბობს მერის მოვალეობის შემსრულებელი ილია ზარდიაშვილი.

[თაკო ფეიქრიშვილი, ახალციხე]