ადიგენში საპროტესტო აქციები დაიწყო

გაურკვეველი ვადით გადაიდო ორგანიზაციის თავმჯდომარის დანიშვნაც. ”ოცნების” შტაბის წინ შეკრებილმა ხუთასამდე აქტივისტმა ლევან ლობჯანიძის თავმჯდომარედ დანიშვნა გააპროტესტა.

ადიგენში ორად გაყოფილმა ”ოცნებამ” დაპირისპირება საპროტესტო აქციებით განაგრძო. დღის ორი საათისთვის დაგეგმილი შეხვედრა, სადაც თავმჯდომარე უნდა დაენიშნათ, ინა კაპანაძის მომხრეებმა ჩაშალეს.

შეგახსენებთ, რომ ადიგენში, ”ოცნების”რაიონული ორგანიზაციის თავმჯდომარის პოსტზე ორი კანდიდატი იბრძვის. აქტივისტების ნაწილი ინა კაპანაძის, ნაწილი კი ლევან ლობჯანიძის დანიშვნას ითხოვს.

”როდესაც დავიწყეთ რეგისტრაცია და მანდატების დარიგება, მოულოდნელად გამოჩნდნენ ინა კაპანაძის მომხრეები მანქანებით და კონფერენცია ჩაშალეს”,- გვითხრა თავმჯდომარეობის კანდიდატმა ლევან ლობჯანიძემ.

ინა კაპანაძის მომხრეები აცხადებენ, რომ პროტესტს მანამდე გააგრძელებენ, ვიდრე მათი კანდიდატი არ გაიმარჯვებს.

”ადამიანს, რომელიც ოთხ წელიწადში ერთხელ ჩამოდის, მხარს ვერ დავუჭერთ. ადიგენი ისეთი რაიონია, სადაც უმრავლესობით ”ნაციონალებმა” გაიმარჯვეს, მათ გამკლავებას ძლიერი ხელმძღვანელი სჭირდება და ასეთი ინა კაპანაძეა”,- ამბობს ირმა ფარულავა.

გავრცელებული ინფორმაცით, ორგანიზაციის თავმჯდომარის წარსადგენად ადიგენში პარლამენტის წევრი ოთარ ჩრდილელი უნდა ჩამოსულიყო, თუმცა შექმნილი ვითარების გამო ჩამოსვლა გადაიდო.

”სამწუხაროდ შეხვედრა ჩაიშალა. პარტია აუცილებლად დაფუძნდება, მაგრამ როდის ზუსტად ვერ გეტყვით. სათაო ოფისმა იცის, რაც ხდება ადიგენში და ველოდებით მათგან დირექტივებს. ეს არის ”ნაციონალების” ბოლო გაფართხალება ”ქართული ოცნების” წინააღმდეგ”,- აცხადებს ლობჯანიძე და ამატებს, რომ კაპანაძე მას პირადად უპირისპირდება.

”როდესაც გამგებლობა უნდოდა, მე მიპირისპირდებოდა მაშინაც და არა სხვა კანდიდატებს. მე როცა ვაწყობდი აქციებს, ის ინტერვიუებს აძლევდა ჩემს წინააღმდეგ. როდესაც კითხვა დავუსვი, ამას რატომ აკეთებდა, პასუხი ვერ გამცა. უტყუარი პასუხი კი მე მაქვს, ინა კაპანაზე არის ”ნაციონალების” სატყუარა, მათი სათამაშო. კაპანაძე ორი ადამიანის ხელმძღვანელი არ ყოფილა და არ ვიცი რა ამბიციები აქვს. ჩვენ სხვადასხვა წონაში ვართ და არ მინდა მასთან ჭიდაობა. როგორც გადაწყვეტენ სათაო ოფისში, ალბათ ისე იქნება”, - ამბობს ლობჯანიძე.

ლობჯანიძის მომხრეების თქმით, აქციის მონაწილეებმა შტაბის კარების შემტვრევაც სცადეს, ამიტომ დასახმარებლად ადგილობრივ პოლიციას მიმართეს, თუმცა მათთან არავინ გამოჩენილა.

საპროტესტო აქცია დღეს დაიშალა. ინა კაპანაძის მომხრეები საპროტესტო აქციიების გამართვეს კვლავ გეგმავენ.

”ისე ჩუმად ხდებოდა ყველაფერი, რომ ხალხმა არაფერი იცოდა. ჩვენ ვაგრძელებთ პროტესტს. რაც დღეს იხილეთ, იმის ანალოგიური გაგრძელდება მანამდე, ვიდრე ხალხის აზრს არ გაითვალისწინებენ”,- აცხადებს ინა კაპანაძე.

შეგახსენებთ, დაპირისპირება ადიგენში რამდენიმე დღეა რაც დაიწყო.

[თინათინ ზაზაძე, ადიგენი]