დღის ორი საათისთვის დაგეგმილი დამფუძნებელი ყრილობა, რომელიც ასპინძის კულტურის სახლში უნდა ჩატარებულიყო, დღეს ისევ აქციის ფონზე ჩაიშალა. „ოცნების“ ის აქტივისტები, რომლებიც პარტიის თავმჯდომარედ პაატა მაისურაძეს მოიაზრებენ, აცხადებენ, რომ რაიონული ორგანიზაციის თავმჯდომარედ მეორე კანდიდატის, მამუკა მელიქიძის დანიშვნას არ დაუშვებენ. იმის გამო, რომ მათ პარტიის წევრთა მოწმობები არ აქვთ და ყრილობას ვერ ესწრებიან, ერთადერთი გზა თავიანთი კანდიდატის მხარდასაჭერად, საპროტესტო აქციით შეკრების ჩაშლაა. მაისურაძის მომხრეებმა მელიქიძის წარმომადგენლები დღეს დარბაზში არ შეუშვეს. მხარეებს შორის დაპირისპირება ფიზიკურ და სიტყვიერ შეურაცხყოფაშიც გადაიზარდა. მაისურაძის მომხრეები ამბობენ, რომ მსგავს აქციებს იქამდე გააგრძელებენ, ვიდრე მათი მოთხოვნები არ დაკმაყოფილდება.
- „დილიდან ველოდებოდით, მაგრამ არ გამოჩნდნენ. ჩვენი წამოსვლის შემდეგ კი, მოვიდნენ და ჩატარება უნდოდათ. ჩვენ ამას არ დავუშვებთ. ყოველდღე შევიკრიბებით, სანამ ჩვენს მიზანს არ მივაღწევთ“, - ამბობს „ოცნების“ აქტივისტი მანუჩარ სესაძე.
აქციის მონაწილეები ამბობენ, რომ მათ ადგილობრივი კადრი უნდათ და ხმათა უმრავლესობით მაისურაძის კანდიდატურას ასახელებენ.
- „24 იანვარს საინიციატივო ჯგუფმა ჩავატარეთ კრება და დასახელდა რამდენიმე კანდიდატურა. ყველაზე მეტი ხმა პაატა მაისურაძემ მიიღო და წარვუდგიენთ „ქართუ ჯგუფს“. მიუხდავად იმისა, რომ ოფიციალურად დავარეგისტრირეთ და გვაქვს ამის ოქმებიც, ჩვენს კანდიდატზე უარი გვითხრეს, რადგან კარკაძის [რეგიონის კოორდინატორი]თქმით და დახმარებით გამოგზავნილია მამუკა მელიქიძე“, - ამბობს კომისიის წევრი,“კონერვატორების“ მდივანი ზაირა ზედგინიძე.
აქციის მონაწილეებს პარტიის დამფუძნებელ ყრილობაზე დასწრების და მათი კანდიდატის მხარდაჭერის უფლება არ აქვთ. ამაში ისინი ყოფილ შტაბის უფროსს, მერაბ ზაქაიძეს ადანაშაულებენ. მათი თქმით, ზაქაიძემ მათი საბუთები გადამალა, რის გამოც პარტიის წევრობას ვერ ადასტურებენ.
ზედგინიძე ამბობს, რომ ახალი ანკეტების აღებას და საბუთების აღდგენას ორი კვირაა ცდილობენ.
- „რეგიონის წარმომადგენელმა გიორგი კარკაძემ ანკეტები არ მოგვცა. ამდენი დღეა ვცდილობთ და მხოლოდ გუშინ შევძელით. დავით საგანელიძემ [ქართული ოცნების ერთ-ერთი ლიდერი] ბევრი თხოვნის და შეწუხების შემდეგ, გუშინ, ღამის პირველ საათზე გადმოგვცა 100 ცალი ანკეტა. გვითხრეს გაწევრიანდით, მხოლოდ დღეის რიცხვითო, ფაქტია, რომ დღევანდელ ყრილობაში ჩვენ მონაწილეობას ვეღარ მივიღებდით“, - გვითხრა ზედგინიძემ.
აქციის მონაწილეები ამბობენ, რომ ეს ყველაფერი შეგნებულად კეთდება. მათი თქმით, მელიქიძე და კარკაძე ყოფილი თანამშრომლები არიან და კარკაძე მელიქიძეს ამიტომ მფარველობს.
მაისურაძის მომხრეები სათაო ოფისიდან რამდენიმე დღეს ითხოვენ, იმისთვის, რომ ყრილობაში მონაწილეობა შეძლონ.
- „ვითხოვთ საბუთები ძველი რიცხვებით აღდგეს. ახლა გვეუბნებიან თუ წევრობა გინდოდათ, აქამდე სად იყავითო. სინამდვილეში კი, შეგვპირდნენ, მერე ტელეფონზე აღარ გვპასუხობდნენ და ასე გაგვიწელეს ორი კვირა. უსამართლობას ვებრძოდით და ისევ იგივე ხდება. არამგონია ბიძინა ივანიშვილმა ეს ყველაფერი იცოდეს, მას ინფორმაციას სხვანაირად აწოდებენ, - ამბობს ზედგინიძე და აქვე ამატებს, - დრო უნდა მოგვცენ, წინააღმდეგ შემთხვევაში, რადგან ჩვენი უფლებები ირღვევა, სასამართლოს მივმართავთ. ჩვენი ამის ფაქტები და ვიდეო მასალები გვაქვს“.
„სამხრეთის კარიბჭე“ვითარების გასარკვევად გიორგი კარკაძეს დაუკავშირდა.
- „მეუღლე მყავს საავადმყოფოში ძალიან ცუდად და ცოტა ხანში დამირკეთ“,- გვითხრა კარკაძემ, თუმცა მოგვაინებით ჩვენს სატელეფონო ზარებს აღარ უპასუხა.
აქციის მონაწილეები ამბობენ, რომ რაიონული ორგანიზაციის დამფუძნებელ ყრილობას იქამდე ჩაშლიან მსგავსი აქციებით, ვიდრე პარტიაში გაწვრიანების და თავიანთი კანდიდატურის მხარდაჭერის უფლება არ ექნებათ.
„მე ვარ დელეგატი და ჩვენ გვაქვს უფლება გადავწყვიტოთ, ვინ იქნება ორგანიზაციის თავმჯდომარე. მელიქიძის მომხრეებს არ შემოვუშვებთ დარბაზში. ჩვენ ვართ „ოცნების“ აქტივისტები, ჩვენ ვიბრძოდით იმ რთულ პერიოდში და სხვას არ მივიღებთ“, - ამბობს ელზა მაზმიშვილი.
შეგახსენებთ, რაიონული ორგანიზაციის დაფუძნებას ასპინძაში რამდენიმე დღეა ცდილობენ. მსგავსი აქციითა და დაპირისპირებით ყრილობა
30 იანვარსაც ჩაიშალა.
[თინათინ ზაზაძე, ასპინძა]