ადიგენში "ოცნების" ყოფილი აქტივისტები საპროტესტო აქციებით იმუქრებიან

„ქართული ოცნების“ წარმომადგენლებმა, რომლებიც გასული წლის არჩევნებზე ადიგენის რაიონულ ორგანიზაციაში განსაკუთრებით აქტიურობდნენ, დღეს არასამთავრობო ორგანიზაციაში „ერთხულოვნება სამართლიანობისკენ“, პრესკონფერენცია გაიმართეს.

გასული წლის არჩევნებზე კოალიციის მხარდამჭერები, ზონის კოორდინატორები და ახალგაზრდული ფრთის წარმომადგენლები აცხადებენ, რომ ის ადამიანები ვინც ხელისუფლების შეცვლაში უშუალო მონაწილეობა მიიღეს, ვისზეც წინასაარჩევნოდ დიდი ზეწოლა ხორციელდებოდა და მუშაობას მუქარის მიუხედავად მაინც აგრძელებდნენ, დღეს ადიგენში შექმნილი კოალიციის შტაბიდან აბსოლიტურად უგულებელყოფილნი არიან.

„ჯერ ლევან ლობჯანიძე დანიშნეს შტაბის უფროსად და ხალხის პროტესტის შემდეგ ის ვანო კაჭკაჭიშვილით ჩაანაცვლეს. „ვაის გავეყარე, ვუის შევეყარეო“ იმ დღეში ვართ. ერთიც და მეორეც „ნაციონალების“ მხარდამჭერი იყო. გარდა ამისა, არსებობს ეჭვი, რომ ლევან ლობჯანიძე ლევან თუმანიშვილთან ერთად ხე-ტყის ბიზნესში იყო ჩართული“, - აცხადებს კოალიცია „ქართული ოცნების“ ახალგაზრდული ფრთის ხელმძღვანელი ლაშა მურმანიშვილი.

მისი თქმით, მას შემდეგ, რაც ადიგენში საპრეზიდენტო არჩევნებისთვის რაიონული ორგანიზაცია ჩამოაყალიბეს, იმ ადამიანებს ვინც გასულ წელს ხელისუფლების შესაცვლელად იბრძოდა არავინ დაუკავშირდა: „ხომ იყო გაფორმებული ვინ იყო შარშან შტაბში და ვინ არა?! რატომ არ სცადეს ამ ადამიანებთან დაკავშირება?! არ გვინდა ეს კანდიდატები წავიდნენ და დანიშნონ ღირსეული ადამიანები! ნუ გააღიზიანებენ ამომრჩევლებს!“

„ერთსულოვნება სამართლიანობისკენ“ ორგანიზაციის დამფუძნებელი გენადი ენდელაძე აცხადებს, რომ ეს ამბავი ასე არ დარჩება: „ყოფილ „ნაციონალებს“ „ოცნებაში“ თუ მიიღებენ მიიღონ, მაგრამ შტაბის უფროსად რატომ ნიშნავენ?!“

ამავე ორგანიზაციის ხელმძღვანელი ქეთევან ხმალაძე ადიგენის რაიონული ოფისის ხელმძღვანელებს ერთკვირიან ვადას აძლევს, რომ ამ ადამიანებს ბოდიში მოუხადონ: „ერთ კვირაში მიპასუხონ რატომ დატოვეს ეს ადამიანები თამაშგარე მდგომარეობაში?! თუ მათი პასუხი იქნება ადექვატური, თავს დავხრი და ბოდიშს მოვუხდი თუ არა და მათ გავხდი ვალდებულს, რომ ამ ადამიანების წინაშე ბოდიში მოიხადონ“.

„ერთსულოვნების“ წარმომადგენლებს დღეს კოალიციის ყოფილმა აქტივისტებმა განცხადებთ მიმართეს. ხმალაძე აცხადებს, რომ ამ ადამინებს ბოლომდე გვერდში დაუდგება და მათთან ერთად სისხლის ბოლო წვეთამდე იბრძოლებს: „საიდან მოვიდა კაჭკაჭიშვილი?! ვინ არის დამკვეთი მისი მოყვანისა?! მინდა ვკითხო „ოცნების ლიდერებს“, როცა ისინი ამბობენ, რომ კარს არავის უხურავენ და მათი კარი "ნაციონალებისთვისაც“ კი ღიაა, მაშინ რატომ მიუხურეს კარი ამ ადამიანებს?! რატომ გახდნენ ისინი იძულებულნი მოემართათ ჩემთვის?“

ყოფილი აქტივისტები აცხადებენ, რომ ამასთან შეგუებას არ აპირებენ და თუ ადიგენის შტაბში „ნაციონალებს“ ხელმძღვანელი თანამდებობებიდან არ გაათავისუფლებენ, მაშინ საპროტესტო აქციებს გამართავენ.

[თამუნა უჩიძე, ახალციხე]