ადიგენში ”ოცნების” ყრილობა შედგა

დამფუძნებელი ყრილობა ადიგენში დღეს გაიმართა. 93 რეგისტრირებული წევრიდან დამფუძნებელ ყრილობაზე 11 წევრი არ გამოცხადდა. ლობჯანიძე ხმათა უმრავლესობით აირჩიეს.

”შეხვედრამ ექსცესების გარეშე ჩაიარა. კაპანაძის [თავმჯდომარეობის მეორე პრედენდენტი ინა კაპანაძე]მომხრეებიდან, მარტო მზია ჭიღლაძე დაესწრო და თავის პოზიცია დააფიქსირა. დამადანაშაულა თითქოს არ ვიცნობ რაიონს და არჩევნებში არ ვეხმარებოდი. სინამდვილეში ადიგენის რაიონში ”ოცნებამ”ერთადერთი უბანი მოიგო, სადაც მე ვმუშაობდი”, - გვითხრა სატელეფონო საუბარში ლევან ლობჯანიძემ.

”ქართული ოცნების” რაიონული ორგანიზაციის დამფუძნებელ ყრილობას თბილისიდან ჩამოსული რეგიონის კოორდინატორი გია კარკაძეც დაესწრო.

ლობჯანიძის თქმით, ოფიციალურად საქმიანობას, 16 თებერვალს, თბილისში ჩატარებული ყრილობის შემდეგ შეუდგებიან.

შეგახსენებთ, რომ თავმჯდომარის პოსტზე ორი პიროვნება ლევან ლობჯანიძე და ინა კაპანაძე იბრძოდა. ”ქართული ოცნება დემოკრატიული საქართველოს” დამფუძნებელი ყრილობა 25 იანვარს უნდა ჩატარებულიყო, თუმცა ინა კაპანაძის მომხრეებმა შეხვედრა საპროტესტო აქციებით ჩაშალეს.

[თინათინ ზაზაძე, ადიგენი]