ადიგენში სხდომა, რომელზეც ლობჯანიძის იმპიჩმენტის საკითხს განიხილავენ, ხმაურით მიმდინარეობს

როგორც ადიგენიდან "სამხრეთის კარიბჭეს" ჟურნალისტი იტყობინება, სხდომას 25 დეპუტატი ესწრება. საკრებულოს თავმჯდომარის მოადგილემ თამაზ ძაძამიამ წარადგინა დღის წესრიგი, რომელშიც მხოლოდ ერთი საკითხი – თავმჯდომარის გადაყენებაა.

იმპიჩმენტის წესით ერთხელ უკვე გადაყენებული და სასამართლოს ძალით დაბრუნებული ლევან ლობჯანიძე, საკრებულოს თავმჯდომარის პოზიციაზე მუშაობას მიმდინარე წლის 7 თებერვალს შეუდგა.

საკრებულოს ყოფილი თავმჯდომარის, იმედა მღებრიშვილის განმარტებით (რომელიც ამ პოზიციაზე ლობჯანიძის იმპიჩმენტის შემდეგ დაინიშნა), ლობჯანიძის თავმჯდომარეობის პერიოდში მუშაობა არაკოორდინირებულად მიმდნარეობდა, ლობჯანიძე აიგნორებდა გამგეობიდან შესულ საკითხებს და არაგუნდურად მართავდა საკრებულოს.

მღებრიშვილის ამ განცხადების შემდეგ, ლობჯანიძემ საკითხების დაკონკრეტება მოსთხოვა, რასაც სხდომაზე ხმაური მოჰყვა.

ლევან ლობჯანიძის თქმით, მისი მუშაობისადმი ყოველთვის ჩასაფრებულები იყვნენ, რომ შეცდომა აღმოეჩინათ.

სხდომას ესწრება ადიგენის მუნიციპალიტეტის გამგებელი ზაქარია ენდელაძე და ასევე, "ქართული ოცნების" შტაბის წევრები თბილისიდან.

შეგახსენებთ, ლევან ლობჯანიძე ადიგენის საკრებულოს თავმჯდომარეობიდან, პირველად, 2015 წლის 4 მარტს, იმპიჩმენტის წესით გადააყენებს, –17 ხმით 10–ის წინააღმდეგ. ლობჯანიძემ გადაყენება უკანონოდ მიიჩნია, სასამართლოს გზით იბრძოლა და სამივე ინსტანცია მოიგო.
უზენაესი სასამართლოს გადაწყვეტილების თანახმად, საკრებულო ვალდებული იყო ყოფილი თავმჯდომარე პოზიციაზე აღედგინა და მისთვის 23 თვის იძულებით განაცდური აენაზღაურებინა, რაც 60, 950 ლარს შეადგენს (დარიცხვით). საკრებულომ ლობჯანიძე პოზიციაზე 7 თებერვლის სხდომაზე აღადგინა, თუმცა, მეორე დღესვე საკრებულოში მისი გადაყენების მოთხოვნით ახალი განცხადება შევიდა.

[ლუბა გიორგაძე, ნინო ნარიმანიშვილი, ადიგენი]