ნუგზარ პარუნაშვილი ახალციხე–ადიგენში დამოუკიდებელ დეპუტატად იყრის კენჭს

ნუგზარ პარუნაშვილმა, როგორც თავად აცხადებს, ცესკოში საინიციატივო ჯგუფი უკვე დაარეგისტრირა, თუმცა იმისთვის რომ დეპუტატობის კანდიდატად დარეგისტრირდეს ჯერ ხელმოწერების შეგროვება სჭირდება.

„400–მდე ხელმოწერა უკვე გვაქვს, ხვალ ალბათ დავასრულებთ და ცესკოში წარვადგენთ“, –ამბობს პარუნშვილი.

ნუგზარ პარუნაშვილი 1948 წლის 2 აპრილს ადიგენის მუნიციპალიტეტის სოფელ უდეში დაიბადა. უმაღლესი განათლება თბილისის სახელმწიფო უნივერსიტეტში მიიღო. მას სამცხე–ჯავახეთში სხვადასხვა დროს სხვადასხვა პოზიცია ეკავა. 1973 წელს მუშაობდა ადიგენის წყალთა მეურნეობის სამმართველოში, 1990–1991წლებში ახალციხის რაიონული საბჭოს აღმასკომის თავმჯდომარის მოადგილე, ასევე საქალაქო მეურნეობის განყოფილების გამგე იყო; 1991 წელს ახალციხის რაიონის საკრებულოს მდივანი გახდა; 2002–2003 წლებში სამცხე–ჯავახეთის მხარეში საქართველოს პრეზიდენტის სახელმწიფო რწმუნებულის მოადგილედ, 2003–2004 წლებში რეგიონის გუბერნატორად დაინიშნა. 2004–2008 წლებში საქართველოს მეექვსე მოწვევის პარლამენტის წევრად აირჩიეს. ამავე წლებში იგი ადამიანის უფლებათა დაცვის და სამოქალაქო ინტეგრაციის კომიტეტის წევრიც იყო.

აცხადებს, რომ პოლიტიკირადნ არასდროს წასულა, ოღონდ ამ პოლიტიკაში ყოველთვის უპარტიო იყო.

„ხალხს უხარია, რომ დამოუკიდებელი ვარ და არცეთ პარტიაში არ ვარ“, – აცხადებს პარუნშვილი და ამატებს – „ოცნება“ მესიმპატიურება და „ნაციონალური მოძრაობის“ წინააღმდეგი ვარ“.

დეპუტატობის დამოუკიდებელი კანდიდატი დარწმუნებულია, რომ საპარლამენტო არჩევნებში ახალციხე–ადიგენის საარჩევნო ოლქში პირველ ადგილზე გავა: „მეორეზე იქნება ვაჟა ჩიტაშვილი, მესამეზე გიორგი კოპაძე და მეოთხეზე, თუ კიდევ ვინმე არ დაასახელეს, გოდერძი კუბლაშვილი გავა“.

ამბობს რომ იმ პერიოდში, როცა რეგიონში ხელმძღვანელ თანამდებობებზე მუშაობდა ხალხს თავი ზრუნვით დაამახსოვრა და ახლა არჩევნებში სწორედ მათი მხარდაჭერის იმედი აქვს: „კოსტავას ფონდში ვიყავი, არა ერთ მრავალშვილიან ოჯახსა და ობოლს დავხმარებივარ. პირნათლად ვემსახურებოდი ჩემ მხარეს“.

პარუნაშვილის საინიციატივო ჯგუფის წევრების დიდი ნაწილი „ქართული ოცნების“ ყოფილი წევრები არიან. ამჟამად მათი სამუშაო ოთახი თამარაშვილის N8-შია, თუმცა აცხადებენ, რომ აქ დროებით არიან.

„დარეგისტრირების შემდეგ საარჩენო კამპანიასაც დავიწყებთ და ოფისიც სხვაგან გვექნება“, – ამბობს პარუნაშვილი.

[თამუნა უჩიძე, ახალციხე]