‘როგორც მოგვხედავს, ისე დავაფასებთ’– ადიგენის მცხოვრებლები 'ქართული ოცნების' კანდიდატზე

22 აგვისტოს საქართველოს პრემიერ–მინისტრმა გიორგი კვირიკაშვილმა ადიგენის მუნიციპალიტეტის მოსახლეობას „ქართული ოცნების“ მაჟორიტარი დეპუტატობის კანდიდატი ადიგენი–ახალციხის საარჩევნო ოლქში, გიორგი კოპაძე წარუდგინა.

„მინდა წარმოგიდგინოთ ადამიანი, რომელმაც ძალიან კარგად იცის აქაური პრობლემატიკა, რომელიც სუნთქავს აქაური მოსახლეობის ცხოვრებით და რომლისთვისაც უცხო არ არის არცერთი საჭირბოროტო საკითხი, რომელიც თქვენ გაწუხებთ“, –ამ სიტყვებით მიმართა შეკრებილებს გიორგი კვირიკაშვილმა.

ადგილობრივების ნაწილი ამბობს, რომ დეპუტატობის კანდიდატს არ იცნობს. თუმცა, ფიქრობენ, რომ რადგან სამთავრობო გუნდის კანდიდატია, გამარჯვების შემთხვევაში ადიგენში არაერთ პრობლემურ საკითხს გადაწყვეტს.

„რაკი „ოცნების“ კანდიდატია, ალბათ დადებითი პიროვნება იქნება“, – ამბობს უდეში მცხოვრები მარიამ ბალახაშვილი.

„პიროვნებას ვერ ვიცნობთ, როგორც მოგვხედავს, ისე დავაფასებთ. ყველაფერი მოსაგვარებელი გვაქვს, არაფერი არ არის ჩვენს სოფელში გაკეთებული“, – ამბობს ჭეჭლაში მცხოვრები ანზორ მიქელაძე.

საარჩევნო ოლექების გაერთიანებით უკმაყოფილოა კახარეთში მცხოვრები დალი ბაღდოშვილი: „არ გვხვდა წილად რომ კანდიდატი გვყოლოდა. ჯერ არ ვიცნობთ და იმედი გვაქვს, თავს გაგვაცნობს და დაგვამახსოვრდება თუ ავირჩევთ. გვყავდა ჩვენი დეპუტატი, ახლა საერთოა. ჯერ ისედაც გართულებულია მისვლა და არ არის ყოველთვის რაიონში დეპუტატი, უნდა ველოდოთ როდის აქვს მიღების დღეები. ჩვენი რაიონის წარმომადგენელი რომ ყოფილიყო, ცნობითაც გვეცნობოდა, მისასვლასა და პრობლემების გადაწყვეტასაც უფრო იოლად მოვახერხებდით“.

ადიგენის მუნიციპალიტეტის გამგეობის მიმდებარე პარკში იმყოფებოდნენ მოხისა და კიკიბოს მაცხოვრებლებიც, თუმცა როგორც განგვიმარტეს ისინი „ქართული ოცნების“ კანდიდატის შესახვედრად არ ჩამოსულან, რადგან „ქართულმა ოცნებამ“ იმედები გაუცრუა.

„მანამდე ქრისტიანებს და მუსლიმებს კარგი ურთიერთობა გვქონდა და დიდი სიყვარული. ხელისუფლებამ გაანელა, გააცივა და დაგვაშორა ერთმანეთს, განდეგილად ვდგავართ. ეს მოხის მეჩეთს ეხება“, – ამბობს კიკიბოს მკვიდრი დავით გობაძე.

„სოფელში რა გამოლევს პრობლემებს, მაგრამ ჩვენ მოვითხოვთ, რომ მოხეში მდებარე მეჩეთი გადმოგვეცეს, შეიკრიბოს მუსლიმი და ქრისტიანი მოსახლეობა. ამას მაჟორიტარობის კანდიდატს არჩევნებამდე მოვთხოვთ, თორემ გამარჯვების შემთხვევაში, აღარავინ მოგვაკითხავს“, – ამბობს მოხეში მცხოვრები ოთარ გიორგაძე.

ადიგენის მუნიციპალიტეტის მოსახლეობის გარდა დეპუტატობის კანდიდატის წარდგენას ქალაქ ახალციხის და ახალციხის მუნიცპალიტეტის პირველი პირები ესწრებოდნენ.

შეგახსენებთ, რომ პრემიერ – მინისტრმა გიორგი კვირიკაშვილმა 22 აგვისტოს, ადიგენის გარდა „ქართული ოცნების“ მაჟორიტარი დეპუტატობის კანდიდატები რეგიონის დანარჩენ მუნიციპალიტეტებშიც წარადგინა.

[თინათინ ზაზაძე, ადიგენი]