‘ქართულმა ოცნებამ’ ახალციხეში მაჟორიტარი დეპუტატობის კანდიდატი წარადგინა

დღევანდელ შეხვედრაზე საქართველოს პრემიერ–მინისტრი, გიორგი გახარია და პარტიის ლიდერები, ირაკლი კობახიძე და კახი კალაძე იმყოფებოდნენ.

„ახალციხელებს მინდა მადლობა გითხრათ, აქტიურად მონაწილეობთ ისეთ სახელმწიფო პროგრამებში როგორიცაა „აწარმოე საქართველოში“ და სოფლის მეურნეობის დახმარების პროგრამები. ერთ–ერთი გამორჩეული რეგიონია და მუნიციპალიტეტი, სადაც ამ სახელმწიფო პროგრამებით სარგებლობენ. ეს კარგია იმიტომ, რომ ხელს უწყობს ქართველ გლეხს გახდეს ძლიერი“, - განაცხადა გახარიამ.

პრემიერ–მინისტრი კანდიდატის წარდგენაზე ადგილობრივებს დაპირდა, რომ ახალციხეს 24 საათიანი წყალმომარაგება და მოწესრიგებული საკანალიზაციო სისტემა ექნება.

ამომრჩევლებს ახალციხე–ასპინძა–ბორჯომი–ადიგენის მაჟორიტარი კანდიდატი, ანტონ ობოლაშვილი კახი კალაძემ წარუდგინა: „მარტივი არ იყო შეგვერჩია ადამიანი ვინც იქნებოდა მართლაც ღირსეული წარმომადგენელი. ჩავატარეთ ძალიან ბევრი გამოკითხვა, ძალიან ბევრი კვლევა და მივიღეთ გადაწვეტილება. დავასახელეთ ადამიანი რომელიც აქ დაიბადა და გაიზარდა, რომელმაც იცის ყველა ის პრობლემა, რაც ამ მხარეში არსებობს“.

ანტონ ობოლაშვილის განცხადებით, მაჟორიტარი დეპუტატობის კანდიდატობა მისთვის დიდი პასუხისმგებლობაა და გამარჯვების შემთხვევაში ეცდება ხალხს ემსახუროს.

„იყო ახალციხელი და მუნიციპალიტეტის მაჟორიტარი კანდიდატი არის დიდი პასუხისმგებლობა, მე მზად ვარ ამ პასუხისმგებლობისთვის და როგორც ყოველთვის დღესაც სიამაყით მინდა გითხრათ მუდმივად ვიქნები ჩემი ქალაქის და ჩემი მუნიციპალიტეტის სამსახურში. მე ვიცნობ ჩემს ქალაქს და კარგად ვიცი თუ რა უნდა გავაკეთოთ, რათა შევქმნათ მეტი დოვლათი ჩვენს მუნიციპალიტეტში“ - განაცხადა ობოლაშვილმა.

„ქართული ოცნების“ მიერ გამართელ ღონისძიებას სამცხე–ჯავახეთის მხარის, ახალციხის მერიის, საკრებულოს, ააიპ–ების, საგანმანათლებლო რესურსცენტრის თანამშრომლები, მესხეთის თეატრის მსახიობები და სასულიერო პირები ესწრებოდნენ.

კითხვაზე, რატომ ესწრებოდნენ მმართველი პარტიის მაჟორიტარი დეპუტატობის კანდიდატის წარდგენის ღონისძიებას სამუშაო საათებში, გვიპასუხეს, რომ შვებულებაში იმყოფებიან.

„დღეს და ხვალ აღებული მაქვს შვებულება“ - გვითხრა ახალციხის მუნიციპალიტეტის მერიის კეთილმოწყობის სამახურის სპეციალისტმა, ირაკლი კურტანიძემ.

რამდენი საჯარო მოხელე იმყოფებოდა კანდიდატის წარდგენაზე და აქედან რამდენს ჰქონდა დაწერილი ერთღდღიანი შვებულება ამ ეტაპზე უცნობია, „სამხრეთის კარიბჭე“ აღნიშნულ ინფორმაციას წერილობით გამოითხოვს.

ობოლაშვილის წარდგენა დღეს, ახალციხის, ადიგენისა და ბორჯომის მუნიციპალიტეტებში გაიმართა. ხვალ კი ასპინძაში გაიმართება.

ხვალვე გაიმართება შეხვედრა ნინოწმინდასა და ახალქალაქში, ჯავახეთში ოფიციალურად სამველ მანუკიანს წარადგენენ.











[მარიამ ბარძიმაძე]