'ახალციხის ციხეზე' ქვედა საპარკინგე ადგილი ჩაკეტეს

მეორე დღეა, ახალციხის ციხის ტერიტორიაზე ტურისტებისთვისა და მოქალაქეების მანქანებისთვის გამოყოფილი საპარკინგე ადგილი დაკეტილია. ტერიტორიაზე შესვლა და ავტომობილის, ასევე ავტობუსის გაჩერება, მხოლოდ ციხის ადმინისტრაციასა და „ჯინო ველნეს რაბათის“კლიენტებს შეუძლიათ.

„განახლებული კონპლექსის გახსნის დღიდან ის ადგილი არის გაქირავებული სასტუმრო „ჯინო ველნესზე“ , 212 კვადრატული მეტრი. ეს ადგილი გათვალისწინებული უმეტესად სასტუმროს კლიენტებისთვის, ასევე ციხის ადმინისტრაციისთვის და საპატიო სტუმრებისთვისაა“,– განმარტავს ახალციხის ციხის დირექტორი ზაზა თამარაშვილი.

მისივე თქმით, აღნიშნული გადაწყვეტილება სასტუმრომ იმიტომ მიიღო, რომ სასტუმროს კლიენტებს მანქანის დასაპარკინგებელი ადგილი აღარ რჩებოდათ. ციხის დირექტორი მიიჩნევს, რომ ეს სწორი ფორმაა.

შეკითხვაზე ხომ არ შეუქმნის საპარკინგე ადგილის ჩაკეტვა სხვადასხვა ქვეყნიდან ჩამოსულ ტურისტს პრობლემას, თამარაშვილი გვპასუხობს: „ამ საპარკინგე ადგილების გარდა გვაქვს სხვა ადგილებიც. დიდი საპარკინგე ადგილია მაღლა, ციხის მეორე შესასვლელში. ასევე, ქვედა ტერიტორიაზე გვაქვს, ამიტომ ტურისტები არ შეფერხდებიან“.

იმის გასარკვევად, რატომ მიიღო სასტუმროს ადმინისტრაციამ საპაკინგე ადგილის ჩაკეტვის გადაწყვეტილება, სასტუმრო „ჯინო ველნეს რაბათის“ მენეჯერს თეონა ჩოკოლაშვილს მივმართეთ, თუმცა უშედეგოდ. მენეჯერმა განაცხადა, ამ საკითხის გასარკვევად არ სცალია.





[ვარლამ წიკლაური, ახალციხე]