ახალციხის ციხეში პირველი სასტუმრო გაიხსნა

სასტუმრო ”ჯინო ველნესს რაბათი” ს.ს. ”საპარტნიორო ფონდისა” და Eurocom Invstment Georgia - ს ერთობლივი დაფინანსებით აშენდა. ინვესტიციის მთლიანი მოცულობა ხუთი მილიონი დოლარით განისაზღვრა.

სასტუმრო ოფიციალურად დღეს გაიხსნა, სადაც ერთდროულად 150-მდე ადამიანის მიღება იქნება შესაძლებელი. 38 ნომერი, მათ შორის ორი ლუქსი და 36 სტანდარტი ახალციხის ციხის ტერიტორიაზე ჩამოსული სტუმრების განკარგულებაში იქნება. შენობაში ასევე განთავსებულია ბარი, რესტორანი, სპა, საუნა და ღია აუზი.

”სასტუმრო არ არის მხოლოდ ის ადგილი, სადაც ადამიანმა მარტო ღამე უნდა გაათიოს. ეს ის ადგილია, სადაც ადამიანმა უნდა დაისვენოს. მაქსიმალურად მიიღოს თავისი ორგანიზმის აღდგენის შესაძლებლობანი და სწორედ ამას პასუხობს ეს კომპლექსი”, - ამბობს სასტუმროს დამფუძნებელი ნოდარ გიორგაძე.

”ჯინო ველნესს რაბათში” ძირითადად ადგილობრივი მოსახლეობაა დასაქმებული.

”ამ ეტაპზე დაახლოებით 32 თანამშრომელია, თუმცა როგორც კი სეზონი გაიხსნება და მუშაობა დაიწყება მათი რაოდენობაც მოიმატებს”, - Eurocom Invstment Georgia-ს დირექტორი ილია თანდარაშვილი.

ახალციხის ციხის ადმინისტრაციაში განმარტავენ, რომ ეს არის პირველი სასტუმრო, რომელიც კომპლექსის ტერიტორიაზე გაიხსნა.

”ასევე ნელ-ნელა იწყებენ სხვადასხვა ბრენდები ახალციხის ციხეში შემოსვლას”, - ამბობს ახალციხის ციხის დირექტორი გუჯა ბიჭაშვილი

სასტუმროს გახსნის ცერემონიალის შემდეგ ს.ს. ”საპარტნიორო ფონდის” აღმასრულებელმა დირექტორმა ირაკლი კოვზანაძემ და სლოვაკეთის ექსპორტ-იმპორტ ბანკის წარმომადგენელმა საქართველოში ტურიზმის სექტორში ერთობლივ პროექტის განხორციელების თაობაზე ხელშეკრულებას მოაწერეს ხელი.



[თამარ თოთაძე, ახალციხე]