ახალციხის ციხის დირექტორი: 'წელს თანამშრომლების დამატება დაგვჭირდება'

2018 წელს ახალციხის ციხის ზედა ტერიტორიაზე, კარიბჭის შესასვლელთან სალარო განთავსდება, მისი ფუნქციონირებისათვის კი ობიექტს მინიმუმ ორი თანამშრომლის დამატება დასჭირდება.

„აუცილებელი იქნება მოლარე, ასევე კონსულტანტი და ა.შ. თუმცა ეს საკითხი ახალციხის მერიასთან შეთანხმებით გადაწყდება“, – ამბობს ახალციხის ციხის დირექტორი ზაზა თამარაშვილი.

ციხის ზედა ტერიტორიაზე სალაროს დამატების აუცილებლობაზე საუბარი ჯერ კიდევ 2016 წლის ნოემბერში დაიწყო, თუმცა ადმინისტრაციამ სალაროს გაკეთება მიმდინარე წელს გადაწყვიტა.

„მთავარი პარკინგი ახალციხის ციხეს ზედა ტერიტორიაზე აქვს, იქ მისულ დამთვალიერებლებს კი ჩვენი თანამშრომლები უხსნიან, რომ ობიექტის ქვედა ნაწილში უნდა ჩავიდნენ და ბილეთი აიღონ. ზედა ტერიტორიაზე სალაროს დამატებით ამ უხერხულობას თავიდან ავიცილებთ, ასევე დამთვალიერებლს უკეთეს სერვისს შევთავაზებთ“, – ამბობს თამარაშვილი.

ციხის დირექტორმა სალაროს გახსნის, თანამშრომლების დამატებისა და ასევე 2018 წელს ობიექტზე განსახორციელებელი ცვლილებების შესახებ „სამხრეთის კარიბჭეს“ ყოვლეკვირეულ გადაცემაში „კვირის აქცენტში“ ისაუბრა.

შეგახსენებთ, რომ ახალციხის ციხეს ამ დროისთვის 80 თანამშრომელი ჰყავს და მათ შორის ცხრა ხელშეკრულებითაა აყვანილი.

[თამუნა უჩიძე, ახალციხე]