‘ოცნებისა’ და ‘ლეიბორისტების’ დაპირისპირება ბორჯომში

გიორგი გიუაშვილი

შემთხვევა ბორჯომში, 10 აგვისტოს, საღამოს, დავით აღმაშენებლის სახელობის ეკლესიის მიმდებარე ტერიტორიაზე მოხდა. როგორც ბორჯომის საკრებულოს წევრი „ლეიბორისტული პარტიიდან“ გიორგი გიუაშვილი ამბობს, იგი ქუჩებში საარჩევნო კამპანიას ეწეოდა.

„მანქანით, დროშებითა და მეგაფონით ხალხს მხარდაჭერისკენ მოვუწოდებდი, ვამბობდი: არ მისცეთ ხმა „ოცნებას“, გედი ფოფხაძეს. ფოფხაძემ მოგვატყუა, არცერთი წინაასაარჩევნო დაპირება არ შეასრულა, კორუფციაა, უმუშევრობაა–მეთქი. ასევე, გამგეობის ხელფასებს ვახმოვანებდი“, – გვიყვება გიუაშვილი.

მისი თქმით, მას შემდეგ, რაც იგი მანქანით გარეუბანში გავიდა, ბორჯომის საკრებულოს წევრის „ქართული ოცნებიდან“, ბესიკ ფოფხაძის წარმომადგენლები, ფოფხაძესთან ერთად, თავს დაესხნენ: „ერთმა მანქანამ წინ გადაგვისწრო, მეორე უკნიდან მოგვადგა. ალყაში მოგვაქციეს. გინებით გადმოხტნენ. 7–8 კაცი გამისწორდა ფიზიკურად. მათ შორის იყო საკრებულოს თავმჯდომარის მაოდგილე გიორგი ფერაძე. ყველა მიმართულებით მირტყამდნენ, ვიცავდი თავს, როგორც შემეძლო. მობილურიც დამიზიანეს“.


ფოტოზე: ბესიკ ფოფხაძე ("ქართული ოცნების" მაისურით)

საწინააღმდეგოს აცხადებს ბესიკ ფოფხაძე. მისი თქმით, შეხლა–შემოხლას ადგილი არ ჰქონია და „ეს რამდენიმე წამიანი სიტყვიერი პაექრობა იყო“. ასევე, ფოფხაძე ირწმუნება, რომ იგი მხოლოდ ორ თანამოაზრესთან ერთად იყო და რაიმე თავდასხმას ადგილი არ ჰქონია.

„გიუაშვილი მეგაფონით „ოცნების“, მოქმედი მაჟორიტარისა და მთავრობის მიმართ ბილწსიტყვაობდა. არანაირ წინასაარჩევნო აგიტაციას მისი მხრიდან ადგილი არ ჰქონია. ჩვენ ამ დროს არდაგანიდან მოვდიოდით. მძღოლს ვთხოვე დავწეოდით. მოვატრიალეთ მანქანა და გიუაშვილს ვანიშნე, რომ გადმოსულიყო“, – გვიყვება ფოფხაძე.

მისი თქმით, მან გიუაშვილს კანონისა და კონსტიტუციის პატივისცემისკენ მოუწოდა: „ჩემთან ერთად ვინც იყვნენ, იმათ ხმა არ ამოუღიათ. გიუაშვილმა პარტიაც შეაგინა ისევ, კონსტიტუციაც და მეც გადმომწვდა. რამდენიმე წინადადებით დავუბრუნე ხურდა და ვუთხარი, შენთან არაფერი გამოვა–მეთქი, ეს იყო და ეს. დაჯდა მანქანაში და წავიდა“.

ინციდენტის შემდეგ გიუაშვილი ბორჯომის რაიონულ სამმართველოში მივიდა. როგორც შინაგან საქმეთა სამინისტროში აცხადებენ, მომხდარზე ძიება სსკ–ის 125–ე მუხლით დაიწყო.

თუმცა, არასამთავრობო ორგანიზაციის წარმომადგენლები მიიჩნევენ, რომ საქმე არასწორად დაკვალიფიცირდა და ძიება სისხლის სამართლის კოდექსში შეტანილი ახალი, 162–ე მუხლით უნდა დაწყებულიყო, რაც არჩევნებში, რეფერენდუმში ან პლებისციტში ნების განხორციელებისთვის ხელის შეშლას გულისხმობს.

„აქ საუბარია იმაზე, რომ წინასაარჩევნო პერიოდში ძალადობა, ან ძალადობის მუქარა, სისხლის სამართლის პასუხსიმგებლობას ითვალისწინებს. ეს მუხლი იმისთვის შემოვიდა, რომ თავისუფალი საარჩევნო გარემო იქნეს უზურნველყოფილი“, – აცხადებს ახალგაზრდა იურისტთა ასოციაციის საარჩევნო პროგრამების კოორდინატორი ირმა პავლიაშილი და ამატებს, რომ მომხდარზე რეაგირება ყველა შესაბამისმა უწყებამ, მათ შორის უწყებათაშორისმა კომისიამაც უნდა მოახდინოს.

შინაგან საქმეთა სამინისტროში გიუაშვილი, ასევე ის ტაქსის მძღოლი, რომელიც მას თან ახლდა, უკვე დაიკითხნენ. ჩვენება მისცა ბესიკ ფოფხაძემაც. მისი თქმით, მასთან ერთად სამმართველოში ის პირებიც დაიბარეს, რომლებიც ინციდენტის დროს თან ახლდნენ.

„სამედიცინო ექსპერტიზა ჩამიტარდა, თვალზე, მხარზე მაქვს მცირე დაზიანებები. ასევე ნეკი თითი მქონდა გასიებული“, – ამბობს გიუაშვილი.

რაც შეეხება ბორჯომის მუნიციპალიტეტის საკრებულოს თავმჯდომარის მოადგილეს გიორგი ფერაძეს, აცხადებს, რომ შემთხვევის ადგილზე არ ყოფილა: „მომხდარის შესახებ გადმოცემით ვიცი“.

[თამუნა უჩიძე, ბორჯომი]