ინციდენტი ბორჯომის მუნიციპალიტეტის საკრებულოს სხდომათა დარბაზში დღეს, 29 აგვისტოს, საკრებულოს სხდომის დამთარების შემდეგ მოხდა. როგორც საკრებულოს დეპუტატი, „ლეიბორისტული პარტიიდან“, გიორგი გიუაშვილი აცხადებს, მას საკრებულოს თავმჯდომარე–ზაზა ჩაჩანიძე, ბორჯომის გამგებელი დიმიტრი ყიფიანი და დეპუტატი ალეკო გელაშვილი ფიზიკურად გაუსწორდნენ.
„ვერ იღებენ კრიტიკას და ძალადობას მიმართავენ. საკრებულოს სათათბირო ოთახის კარი ჩაკეტეს და ფიზიკურად გამისწორდნენ, ხელიც მაქვს დაზიანებული“, – აცხადებს „სამხრეთის კარიბჭესთან“ გიორგი გიუაშვილი.
მისივე თმით, მომხდარის მიზეზი, 22 აგვისტოს ტელეკომპანია „მაესტროსთვის“ მიცემულ კომენტარი გახდა, სადაც გიუაშვილი უკმაყოფილებას გამოთქვამდა საკრებულოს წევრების უფლებამოსილების განხორციელებისთვის საჭირო თანხის გამოყოფაზე.
ბორჯომის მუნიციპალიტეტის საკრებულოს თავმჯდომარე ზაზა ჩაჩანიძე ადასტურებს, რომ შელაპარაკება ნამდვილად მოხდა, თუმცა სხდომათა დარბაზის კარის ჩაკეტვას და ფიზიკურ დაპირისპირებას კატეგორიულად უარყოფს.
„კარი, რომ ჩაკეტილი ყოფილიყო დაცვა ოთახში ვერ შევიდოდა. ფიზიკური დაპირისპირება არ დამინახავს, ჩოჩქოლი იყო და ყველა აშველებდა. ეს დაპირისპირება სახელფასო დანამატების თემამ გამოიწვია, – ამბობს ჩაჩანიძე და ამატებს, რომ მაჟორიტარული სიით გასულ 15 დეპუტატს მსგავსი ანაზღაურება აქვს – ეგ რატომ უნდა იყოს გამორჩეული არ მესმის“.
ვითარების გასარკვევად „სამხრეთის კარიბჭე“ ბორჯომის მუნიციპალიტეტის გამგებელს, დიმიტრი ყიფიანსაც დაუკავშირდა. მისი თქმით, იგი საკრებულოს სხდომას თავიდანვე ესწრებოდა. როგორც დიმიტრი ყიფიანი განმარტავს, გიუაშვილის გაღიზიანება საკრებულოს წევრების კითხვამ გამოიწვია. რაც შეეხება ფიზიკური დაპირისპირების ფაქტს, ამას ყიფიანი კატეგორიულად უარყოფს.
„გიუაშვილმა საკრებულოს წევრების უფლებამოსილების განხორციელებისთვის საჭირო თანხის გაცემის თაობაზე „მაესტროს“ მისცა ინტერვიუ, რომ ეს არასწორია და უარს ვამბობ ამ თანხაზეო. რაც არის სიცრუე, მას ამ თანხაზე უარი არ განუცხადებია, როცა მას მოვთხოვეთ პასუხი ამ სიცრუეზე, რომელიც მთელმა ქვეყანამ გაიგო, შელაპარაკდა ერთ–ერთ დეპუტატთან ალეკო გელაშვილთან და შეურაცხყოფა მოგვაყენა. ალბათ მიხვდა, რომ ტყუილი თქვა და თავის დაცვა გინებით და შეურაცხყოფით დაიწყო“, – ამბობს დიმიტრი ყიფიანი.
მისივე თქმით, გიუაშვილი ყველაზე მთავარ ფაქტს მალავს, რის გამოც მას პასუხი მოეთხოვება, როგორც სამართალდამცავების წინაშე, ასევე სხვა შესაბამის ორგანოებთან.
„მოხდა უარესი, რომელსაც მალავს. ალეკო გელაშვილს სახლის წინ დახვდა და ქვა ჩაარტყა სახეში. ტუჩი აქვს გახეთქილი და ორი კბილი მოტეხილი, ის ამჟამად იმყოფება ექიმთან, ალბათ შეაფასებს ექსპერტი მის მდგომარეობას და მიეცემა მსვლელობა ამ საქმეს“, –ამბობს იგი.
მომხდარს დეპუტატი ალეკო გელაშვილიც ადასტურებს და ამბობს, რომ გიორგი გიუაშვილის წინააღმდეგ საჩივრით სამართალდამცავებს დღესვე მიმართავს.
„სხდომიდან სახლში ვბრუნდებოდი და შესასვლელთან გიუაშვილმა დამიძახა. მივბრუნდი და ვისაუბრეთ, როდესაც წავიდა და მე სადარბაზოსკენ შემოვტრიალდი, სახეში ჩამარტყა, ზუსტად ვერ გეტყვით ეს ქვა იყო, თუ სხვა რაღაც და გაიქცა“, – ამბობს იგი.
მოხდარის შესახებ საჩივარი ბორჯომის რაიონულ სამმართველოში უკვე შეიტანა გიორგი გიუაშვილმა.
შსს–ში განმარტავენ, რომ საქმეს სსკ 125–ე მუხლით იძიებენ.
[თინათინ ზაზაძე, ბორჯომი]