დეპუტატი გიორგი გიუაშვილი: 'თანამდებობას ვტოვებ'

კომისიის თავმჯდომარის თანამდებობის დატოვების შესახებ, გიორგი გიუაშვილმა, რომელიც ამავე დროს "ლეიბორისტული პარტიის" წევრია, განცხადება საკუთარი ფეიბუქის გვერდზე გამოაქვეყნა.

"ვერ ვითანამშრომლებ "სულგაყიდულ", უპრინციპო, მხოლოდ საკუთარ კეთილდღეობაზე მზრუნავ თანამდებობის პირებთან, მიმიფურთხებია "ასეთი" თანამდებობებისათვის და ხელფასებისათვის, თქვენზე მეტი მიბრძოლია და მიკეთებია ჩემი ბორჯომისათვის და ასე გავაგრძელებ მომავალშიც თანამდებობის და ხელფასის გარეშეც. წერილობით გიდასტურებთ ჩემს თანამდებობიდან გადადგომას", – წერს გიორგი გიუაშვილი ფეისბუქზე.

მისი თქმით, აღნიშნულის შესახებ საკრებულოს თავმჯდომარეს გიორგი გოგიჩაიშვილს დღეს, 13 ივნისს წერილობით მიმართავს: "საკრებულოში ვრჩები, თუმცა არანაირი თანამდებობა აღარ მექნება".

გიორგი გიუაშვილი ბორჯომის საკრებულოს გარემოს დაცვის და აგრარულ საკითხთა კომისიის თავმჯდომარედ 2017 წლის 20 ნოემბერს აირჩიეს.

[თინათინ ზაზაძე, ბორჯომი]