ხორბალი თუ არჩევნები: უწყებათაშორისი კომისია ადმინისტრაციული რესურსის შესაძლო გამოყენებაზე

უწყებათაშორისი კომისია იმ შეხვედრასთან დაკავშირებით, რომელიც ახალციხის მერმა და მისმა თანამშრომლებმა, ასევე, ახალციხის გამგეობის წარმომადგენლებმა „ქართული ოცნების“ აქტივისტებთან ადმინისტრაციულ შენობში გამართეს, დარღვევას ვერ ხედავს.

„მოწოდებული ინფორმაციის თანახმად, თათბირზე განხილული იყო ისეთი საკითხები, როგორიცაა: მუნიციპალიტეტის ბიუჯეტით გათვალისწინებული ინფრასტრუქტურული პროექტების განხორციელება/მიმდინარეობა, მოსავლის (მათ შორის, ხორბლის, ქერის) აღება, კომბაინ(ებ)ის მობილიზება და სხვა, მუნიციპალიტეტისთვის კანონით მიკუთვნებული უფლებამოსილებიდან გამომდინარე საკითხები.
მუნიციპალიტეტის თანამშრომლებთან შეხვედრაზე (თათბირზე) არანაირ პარტიულ ან საარჩევნო საკითხებზე საუბარი არ ყოფილა და არც „ქართული ოცნების“ აქტივისტებთან შეხვედრას ჰქონია ადგილი“, – ნათქვამია უწყებათაშორისი კომისიის პასუხში, რომელიც „სამხრეთის კარიბჭემ“ ელექტრონული ფოსტით მიიღო.

როგორც აღნიშნულ წერილშია მითითებული, კომისია მთავრობის ადმინისტრაციის რეგიონებსა და ადგილობრივ თვითმმართველ ორგანოებთან ურთიერთობის დეპარტამენტის მიერ მოწოდებულ ინფორმაციას დაეყრდნო.

კომისიას იმის შესახებ, თუ რა უნდოდათ აღნიშნულ შეხვედრაზე „ოცნების“ აქტივისტებს არ უმსჯელია, არც იმაზე გაუმახვილებია ყურადღება, რატომ ესწრებოდნენ ხორბლის მოსავლის შესახებ შეკრებას თვიმმართველი ქალაქის მერი და მისი თანამშრომლები.

„საერთაშორისო გამჭვირვალობა – საქართველოში“ აცხადებენ, რომ უწყებათაშორისმა კომისიამ მხედველობის მიღმა დატოვა ის, რაც ამ შემთხვევაში ყველაზე მნიშვნელოვანი იყო.

„ეს პოტენციური დარღვევაა საარჩევნო კოდექსის. აქ ყველაზე მთავარი იყო ის, რომ შეხვედრას ესწრებოდნენ პარტიული აქტივისტები“, – აცხადებს „საერთაშორისო გამჭვირვალობა – საქართველოს“ იურისტი გიგი ჩიხლაძე.

მისი თქმით, იმ შენობების ჩამონათვალში, სადაც წინასაარჩევნოდ აგიტაცია უნდა გაიმართოს, ახალციხის ადმინისტრაციული შენობა არ არის: „ამიტომ ამ შემთხვევაში თუ შენობაში აქტივისტები იყვნენ, ეს წინასაარჩევნო აგიტაცია გამოდის. საორგანიზაციო ტიპის შეხვედრაც აგიტაციაა და ეს დარღვევაა“.

კონკრეტულად რას დაეყრდნო უწყებათაშორისი კომისია აღნიშნული შეხვედრის შესახებ მსჯელობისას, ან რა კავშირი აქვს ხორბალთან თვითმმართველი ქალაქის მერს და რა უნდოდათ ამ შეკრებაზე „ოცნების“ აქტივისტებს, „სამხრეთის კარიბჭემ“ უწყებათაშორის კომისიას ამ კითხვებით წერილობით ისევ მიმართა, თუმცა, ჯერ პასუხი არ მიგვიღია.

[თამუნა უჩიძე, ახალციხე]