კანდიდატი მერიის მიერ გამართულ შეხვედრაზე – საოლქო დარღვევას ვერ ხედავს

N37–ე ახალციხის საოლქო კომისიამ 14 აგვისტოს მერიის მიერ ორგანიზებულ შეხვედრაზე ახალციხე–ადიგენში „ქართული ოცნების“ მაჟორიტარი დეპუტატობის კანდიდატის გიორგი კოპაძის გამოსვლაში დარღვევა ვერ დაინახა.

კომისიამ იმის დასადგენად ჰქონდა თუ არა კოპაძის მხრიდან ადმინისტრაციული რესურის გამოყენების ფაქტს ადგილი, მხოლოდ შესაძლო დამრღვევებს გიორგი კოპაძესა და ახალციხის მერიას მიმართა. შესაბამისად, კომისიამ საკუთარ დასკვნაში ის გაიმეორა, რასაც „სამხრეთის კარიბჭეს“ მიერ ამ ფაქტის გახმაურების შემდეგ მერიის კუტლურის სამსახურის უფროსი მარინა ჯინჭველაძე და თავად კოპაძე ირწმუნებოდნენ.

„კოპაძე მიწვეული იყო როგორც აფხაზეთის ომის ვეტერანი და როგორც აფხაზეთის ომის სხვა ვეტერანები, ისე ესწრებოდა აღნიშნულ ღონისძიებას. აღნიშნულ ღონისძიებაზე გიორგი კოპაძე ნამდვილად გამოვიდა სიტყვით, რაც აღნიშნულა როგორც მერიის, ასევე კანდიდატის პასუხშიც, თუმცა, ისინი კატეგორიულად უარყოფენ პოლიტიკური განცხადებების გაკეთებას“, – ნათქვამია ახალციხის საოლქო კომისიის წერილში.

შესაბამისად, კომისია ადმინსიტრაციული რესურისის დარღვევის შესახებ ოქმის შედგენას არ გეგმავს.

იურისტები ირწმუნებიან, რომ საკითხი საოლქო კომისიას ფორმალურად აქვს შესწავლილი და მას სრულყოფილად საქმის დეტალები არ გამოუკვლევია.

„მხოლოდ სავარაუდო დამრღვევთა მხრიდან მიღებული ახსნა-განმარტება არ შეიძლება საფუძვლად დაედოს ადმინისტრაციული ორგანოს გადაწყვეტილებას. ასეთ შემთხვევაში, ეჭვქვეშ დგება გამოცემული აქტის სამართლებრივი დასაბუთების ხარისხი“, – აცხადებს „ახალგაზრდა იურისტთა ასოციაციის“ სარჩევნო პროექტების იურისტი რატი თინიკაშვილი.

შეგახსენებთ, რომ 14 აგვისტოს, ახალციხეში, ახალციხის მერიამ აფხაზეთის ომის დაწყების 24 წლისთავთან დაკავშირებით გამართა ღონისძიება, რომელსაც ახალციხის ყოფილი მერი, ამჟამად, ახალციხე–ადიგენის საარჩევნო ოლქში "ქართული ოცნების" მაჟორიტარობის კანდიდატი გიორგი კოპაძე ესწრებოდა. კოპაძე ღონისძიებაზე სიტყვით გამოვიდა. იურისტები განმარტავენ, რომ კანდიდატის ბიუჯეტიდან დაფინანსებულ ღონისძიებაზე დასწრება ადმინისტრაციული რესურსის გამოყენების ნიშნებს შეიცავდა.

[თამუნა უჩიძე, ახალციხე]